Лажно презентираната фактичка состојба за безбедноста на Македонија може да биде само обид да се нарушат меѓуетничките односи, вели министерката Гордана Јанкулоска во интервју за „Радио Слободна Европа“.

„Крајно неиздржано е некои политичари да се обидуваат да го градат сопствениот рејтинг или рејтингот на нивната партија преку импровизации и шпекулации по однос на безбедноста на Република Македонија“, вели Јанкулоска.

Според неа, за инцидентите кои се случуваа неодамна не може и не смее да има толеранција, ниту од страна на политичарите, нити од страна на институциите.

За случајот „Монструм“ Јанкуловска вели дека судот побара да не се изнесуваат дополнителни информации во јавноста, а за кој судењето почнува за само неколку дена.

„Јас во оваа прилика верувам дека кај вас и кај граѓаните ќе наидам на разбирање за мојата воздржаност по однос на коментирање на конкретни чекори и активности што се преземаат или што може да бидат преземени во иднина, бидејќи сепак, најважно за сите нас е овој случај да добие судска завршница“, додава Јанкулоска.

Смета дека кога имаме зголемен број инциденти во автобусите, на спортските натпревари, имаме оперативни сознанија за недозволена трговија со луѓе во некои од баровите некаде на територијата на Република Македонија или имаме какви било индиции за можно проблематично однесување на одредени лица, тогаш се разбира дека полицијата треба, мора и може да пристапи кон засилена примена на оперативно собирање информации по однос на сторителите на тие кривични дела, по однос на луѓето кои провоцираат или креираат инциденти и се разбира дека сето тоа се прави во непосредна координација со јавниот обвинител и во постапка утврдена со закон.

„Значи не постои ни најмал простор за граѓаните да се сомневаат или да стравуваат за нивните слободи и права, меѓутоа онака како што е во земјите членки на ЕУ“, вели Јанкулоска во интервјуто за „Радио Слободна Европа./крај/рсе/бб