Македонија
Груевски: Црвенковски сака да ја врати власта со насилство
Лидерот на СДСМ, Бранко Црвенковски е цврсто решен да се врати на власт со насилство, со тепање како што вчера тргна кон пензионерите, земјоделците, студентите, изјави премиерот Никола Груевски по изјавата на Црвенковски кој најави блокирање на сообраќајници и секаков вид граѓанска непослушност.
„Тој отворено кажува дека е цврсто решен да се врати на власт со насилство, со тепања, како што вчера се обиде кога тргна кон пензионерите, кон земјоделците кон студентите кон сите оние кои беа на другата страна. Така што од тој аспект загрижува неговото однесување, тоа е лошо за демократијата, за демократијата е нормално некој да демонстрира или на некој начин да штрајкува, но сé додека не се употреби насилство. Оној момент кога ќе се употреби насилство тоа е веќе нешто друго, кршење на законите, кршење на Уставот, уривање на имиџот на државата, правење лоша слика за земјата. Практично, забележувам дека во сите настани кои го уриваат имиџот на земјата во последно време директно учествува самиот Бранко Црвенковски“, изјави Груевски.
Груевски смета дека во понеделникот во Собранието имало излив на насилство од страна на пратениците на СДСМ, коишто, според него, се обиделе да го нападнат претседателот на парламентот, Трајко Вељаноски.
„Беше запоседната институцијата, да не беше обезбедувањето во самото Собрание, веројатно ќе беше доведен во прашање животот на претседателот на Собранието. Собраниското обезбедување со крајни напори го извлече од салата претседателот на Собранието и тоа беше практично запоседнато. Пратениците на СДСМ почнаа да се качуваат на маса, да скокаат, да рипаат, да тегнат микрофони, седнаа на столчето на претседателот, симболични кажано сакаа да покажат дека го заземаат на сила парламентот на Македонија на нелигитимен начин, незаконски начин со грубо кршење на законите и на Уставот. Оттаму. во една таква ситуација, независно кој го прави тоа, должност но и обврска на собраниското обезбедување во секоја земја е да го заштити парламентот, да го заштити животот и здравјето на претседателот на Собранието и да овозможи продолжување на работата на парламентот. Тоа се случи вчера и доколку имало некакви пречекорувања, тие ќе се разгледаат на снимките. Но од она што јас сум информиран собраниското обезбедување со крајни напори и со многу претрпени удари од другата страна успееле да создадат ред и можност да продолжи да работи парламентот без да бидат загрозени животите и работата на пратениците“, изјави Груевски.
Изјавата на Црвенковски дека жали што протестите не биле порадикални, Груевски ја оцени како многу опасна изјава. Повикот на Црвеновски граѓаните да не ги плаќаат даноците и сметките, го оцени како време кое веќе поминало.
„Мислам дека Црвенковски сé уште живее во времето на 90-тите кога тој беше премиер и кога можеше да не се плаќаат даноци и никому ништо да не му се случи. Неговите блиски не ги плаќаа даноците, а сите други требаше да ги плаќаат даноците. Тоа време е поминато и денес во Македонија владеат закони, Устав, независно кој од која партија е“, рече Груевски./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левица ветува изградба на споменик за бранителите од Вејце
Политичката партија Левица вели дека ако дојде на власта ќе изгради во Вејце споменик во помен на загинатите бранители, кои несебично се жртвуваа во војната во 2001 година.
„Масакрот од 2001 година во село Вејце останува дел од колективната меморија на Македонците како најголем пораз на државните институции од група на терористи, кои ден денес немаат праведна судска разврска, туку напротив истите тие кои ги направија овие злосторства беа амнестирани и наградени со удобни фотелји.
Делегација на Левица на 28 Април ќе положи свежо цвеќе за сеќавање на жртвата на осуммина припадници на специјалната единица “Волци” кои беа убиени, масакрирани и живи запалени на истиот тој ден пред 23 години.
Проектот го изготви м-р Андреа Јанков, координатор на секторот за Урбанизам и локална самоуправа на Левица“, велат од партијата.
Македонија
Маричиќ: Евроинтеграцијата е премногу важна цел за да се потклекне пред предизвиците
Првиот заменик претседател на Владата за европски прашања Бојан Маричиќ ја пречека Вицепремиерката за европски прашања на Република Молдавија Кристина Герасимов. По остварената средба во Секретаријатот за европски прашања, Вицепремиерите одржаа заедничка прес конференција во Владата на Република Северна Македонија.
На прес конференцијата Вицепремиерот Маричиќ ја пренесе заедничката определба на двете држави што побргу да го завршат процесот за преговори за членство во ЕУ. Во продолжение интегралната изјава на Вицепремиерот Маричиќ.
„Откако на Самитот на ЕУ во Шпанија минатата година беше утврдена целта дека следното проширување на ЕУ е позиционирано до 2030 година, и откако Европскиот Совет донесе одлука да ги отвори пристапните преговори со Молдавија и Украина, Северна Македонија и Молдавија имаат заедничка цел. Со тоа стануваме и стратешки сојузници.
Република Молдавија сега го отпочнува скрининг процесот, додека ние го завршивме успешно во декември минатата година. Успешниот скрининг е резултат на ангажманот на речиси илјада владини претставници и експерти од академскиот и граѓанскиот сектор, за што добивме признанија од страна на Европската Комисија.
На колешката Герасимов ѝ пренесов дека Северна Македонија ќе им го стави на располагање сето знаење и искуство од овој процес на нашите колеги од пријателска Молдавија. Исто како што ние ја добивме поддршката од Хрватска и Словенија, Србија и Црна Гора.
Тоа е европската солидарност. Тоа е израз на пријателство и поддршка како европски вредности.
И двете држави сериозно претендираме на членство при следното проширување до 2030 година. Тоа проширување добива на значење и во забрзување заради геостратешките и безбедносните аспекти, Но, исто толку сме свесни дека за членство во ЕУ мора да ги исполниме и објективните критериуми и стандарди. Секоја земја одделно со своите специфики и перформанси е повикана да ги постигне тие стандарди, но споделувањето на искуствата на тој пат е од огромно значење и секогаш добредојдено.
Исто така, имаме сериозна намера и подготвени сме да ги извлечеме најдобрите придобивки од Планот за раст, кој треба да донесе дополнителна динамика во евроинтегративните процеси на земјите претенденти за членство во ЕУ.
Креиран, како финансиска и политичка инвестиција во регионот, Планот за раст со шесте милијарди евра за Западен Балкан е подадена рака за забрзување на процесот за членство до 2030 година. Тоа е брза лента на патот на евроинтеграцијата. Планот за раст бара реформи од државите и од владите, а придобивките се во системските промени кои ги обезбедуваме низ тие реформи, во финансиските пакети за земјава и во економската интеграција во единствениот европски пазар.
Мораме да останеме силно посветени на европската реформа агенда, зашто само на тој начин, токму преку Планот за раст ќе си обезбедиме слободно движење на стоки, услуги и работници, пристап до Единствената платежна област, олеснување на патниот транспорт, интеграција во индустриските синџири на снабдување, интеграција и де-карбонизација на енергетските пазари, како и во дигиталниот единствен пазар.
На овој пат до членството во ЕУ, сите земји кои се во преговори или се кандидати се соочуваат со предизвици кои бараат одговорни одлуки. Северна Македонија сега е пред таков предизвик. Ние нема да се откажеме од донесувањето на потребните одлуки за да ги продолжиме започнатите преговори.
Со колешката Герасимов се согласивме дека евроинтеграцијата е премногу важна цел за да се потклекне пред предизвиците. За двете земји членството во ЕУ е приоритет во остварувањето на врвните државни интереси.
Македонија
„Не е законски да не е осигурана Клиниката, за тоа треба да преземе одговорност менаџментот“, кажа Демири
Министерот за здравство Илир Демири кажа дека штетата на Токсикологија е покриена, откако имаше хаварија со цевката за парно.
„Клиничкиот центар има заеднички служби кои се наменети за тоа, тоа им е примамрна обврска да се грижат за Клинички центар и за сите хаварии што можат да се случат. Хаваријата со цевката за парно е санирана уште вчера од страна на заеднички служби“, рече Демири.
Дали е потпишан договор или не, тоа се интерни договори на Клиниките кои морам да ги проверам, додаде министерот.
Во однос на болничарот кој требаше да биде суспендиран, Демири кажа дека има една голема неправда направена на Токсикологија, а тоа е необезбедување на согласност од страна на менаџментот на таа институција за обезбедување договори за 18 вработени кои се дел од медицинските процедури, кои веќе 4 месеци служат на таа институција, а не добиваат никаква економска надокнада.
„Во тек е изборна кампања, не сакам да се прекрши ниту една законска процедура, чекам да дојде извештајот на Инспекцискиот надзор кој ги има обврзано во тек на 5 дена менаџментот да најде решание за 18 луѓе кои работат, а не добиваат надокнада. Не е законски да не е осигурана Клиниката, за тоа треба да преземе одговорност менаџментот“, кажа Демири.
На новинарско прашање, министерот одговори дека економската директорка оди на работа и не се паркира на влезот на Клиниката.
„Не се точни наводите дека доаѓала на работа по четири саати, според моите сознанија“, додаде Демири