Секој независен набљудувач однадвор како незрелост би ја оценил блокадата на Собранието од страна на опозицијата, оцени шефот на македонската дипломатија Никола Попоски, реферирајќи пред собраниската Комисија за надворешна политика, каде не присуствуваа опозициските пратеници.

Прашан како бојкотот ќе се одрази врз интеграциите на земјата, Попоски порача дека ваквата ситуација единствено е во полза на оние што бараат изговор да не го поддржат влезот на Македонија во ЕУ и во НАТО.

„Првата забелешка што било кој независен набљудувач од надвор би ја имал по однос на ова прашање би било незрелост, односно неположување на тестот на свесноста дека во рамки на институции во една демократија се решаваат и се надминуваат определени несогласувања и проблеми. Јас лично жалам што денеска нема преставници од страна на оние кои најавија дека ќе го бојкотираат, бидејќи мислам дека ова е форумот на кој треба да дадам отчет за тоа што направила извршната власт, да продискутираме за тоа што може да направи дополнително во наредниот период“, рече Попоски.

„Со таков еден пристап губиме сите, губи како она поле за дебата во рамки на институциите, така и од аспект на перцепцијата која можеме да ја креираме надвор. Добиваат единствено оние кои имаат интерес да најдат изговор повеќе за неподдржување на таквите процеси. Не би го занемарил фактот што единствено таа вест има привлечено некакво внимание во грчката медиумска сфера за разлика од било кое остварување или прекршување на маѓународното право во изминатиот период. Единствена вест што се проби во грчкиот медиумски простор од Македонија е токму тоа, најавениот бојкот на Собранието и покажаната незрелост во рамки на таа дебата“, рече Попоски пред членовите на Комисијата за надворешна политика.

Дел од пратениците, во рамки дебатата, повикаа опозицијата да се врати во собраниските клупи./крај/мф/ач