Нова социјалдемократска партија (НСДП) на свечена седница на Централниот одбор, одржана во Скопје, во хотел „Хилтон“, го одбележа јубилејот 20 години од основањето на партијата.

Процесот на формирање на НСДП започна на 23 ноември 2005 година, со прес-конференција во хотел „Александар Палас“, на која за првпат беше најавено создавањето на нов политички субјект со јасна визија и чиста намера – Нова социјалдемократска партија.

На 30 ноември 2005 година, на конвенција во Универзалната сала, првиот претседател на партијата, Тито Петковски, официјално го најави влегувањето на НСДП на политичката сцена.

Основачкиот конгрес на НСДП се одржа на 17 декември 2005 година во Македонскиот народен театар, на кој беа усвоени Статутот и Политичката платформа и беа избрани првите органи на партијата.

„Во изминатите дваесет години, НСДП се изгради како стабилен и значаен политички чинител кој секогаш ги става државните приоритети на прво место. Борбата за слобода и демократија и рушењето на режимот на Никола Груевски се меѓу најголемите општествено-политички успеси во кои НСДП зеде активно и значајно учество, дејствувајќи принципиелно и одговорно во интерес на граѓаните“, велат од Партијата.

Членството на државата во НАТО, како и големите социјални реформи спроведени од владите во периодот 2017–2024г, претставуваат значајни успеси и јасна потврда за реализацијата на програмските определби на НСДП, водени од слоганот: „Силно и чесно! За пристоен живот.“

Денес, кога растот на платите стагнира, кога социјалниот дијалог не функционира, синдикатите се омаловажени, а нивниот глас не е слушнат од Владата и кога работниците не се вистински вреднувани, НСДП е тука да биде нивниот глас — за правда, за праведна распределба на трудот и капиталот и за доследна борба за унапредување на работничките права – истакна претседателот Мисовски во своето обраќање.

„Под водство на претседателот Горан Мисовски, НСДП останува доследна на своите темелни вредности: борбата за социјална правда и еднаквост, јакнење на демократските институции, заштита и унапредување на работничките права, почитување на трудот, грижа за маргинализираните и обесправените, родова еднаквост, како и европеизација на општеството и интеграција во евроатлантските структури.

НСДП и во наредниот период ќе продолжи да дејствува одговорно, принципиелно и во интерес на граѓаните, со јасна определба за праведно, солидарно и демократско општество“, се додава во соопштението на НСДП.

Коалицијата „Вреди“ оценува дека прекинувањето на функцијата на јавниот обвинител означува крај на период што како што велат од таму, предизвика длабока загуба на јавната доверба во Јавното обвинителство.

„Довербата на граѓаните беше уништена од конкретни случаи што ги видоа со свои очи, како што е случајот со Иџет Мемети, каде што службеник за правосудство заврши со блага казна, додека обичните граѓани беа казнети за многу помали грешки.

Меѓународните проценки, исто така, сериозно ја погодија довербата во правдата, вклучително и вклучувањето на Артан Груби и Енвер Беџети на американската црна листа за сериозна корупција и поткопување на процесот на правосудство, додека институциите сè уште не дадоа јасен епилог за овие случаи“.

Коалицијата „Вреди“, како што нагласуваат, ќе инсистира процесот за избор на нов јавен обвинител да биде чист, транспарентен и ослободен од политички влијанија. Според нив, враќањето на довербата на граѓаните во правосудниот систем е обврска што не може повеќе да се одложува.

Целата македонска јавност е сведок дека од ВМРО-ДПМНЕ со денови се измислуваат теми, се конструираат случаи, се шират невистини, истакнуваат од СДСМ.

Кујните на ДПМНЕ, додаваат од оваа партија, со денови прават обиди да се одвлече вниманието на граѓаните од најважното прашање: предавството на Македонија, мигранти за пари.

„Во Собранието доставија документ за предавство на државата за пари, а паралелно постојано пласираат измислени теми за дефокус. Кујните работат со полна пареа.

„СДСМ ја напуштија седницата кога требаше да се разговара за Резолуцијата за наводни мигранти“ објавија кујните на ДПМНЕ.

А вистината? Премиерот Мицкоски побегна од пратенички прашања и од дискусија за Резолцијата на СДСМ со која се става крај на оваа тема.

Дури и изјавите на амбасадорката на САД беа предмет на манипулации. Таа потврди дека разговори за мигранти водат многу земји, меѓу кои и САД, но „не може да зборува за разговорите што ги води Обединетото Кралство“.

Но, кујните на ДПМНЕ веднаш ја зготвија минуплацијата дека таа всушност му упатила пораки на претседателот Филипче“.

Од СДСМ додаваат дека преку успешната акција „Разоткривање“ на Антикорупискиот тим на партијата тој систем целосно е разоткриен и сега што и да прават само го потврдуваат она што е покажано.

„Сè е по сценариото на Вучиќ, copy-paste. Во 2016 година за време на изборите во САД во Македонија функционираше центар за производство на лажни вести, кој беше користен во кампањата против кандидат за претседател на САД.

Пред неколку дена, актуелниот претседател на САД на својот X-профил објави дека при изборите во 2020 година (против него) биле користени сервери од Србија за манипулација со електронското гласање.

А видовме и вчера како завршува таа политика. Србија доби шлаканица од САД. Кушнер се повлече од проектот затоа што Вучиќ манипулирал со документацијата, а народот масовно се крена против проектот. За сето ова пишуваше и New York Times.

По тоа следеше уште една шлаканица, овој пат од Европската Унија. Марта Кос јасно порача: сакаме Србија, но демократска Србија.

Тоа е истата политика на ДПМНЕ во Македонија.

Лажни вести, манипулации, одвлекување на вниманието на граѓаните од главните теми, од криминалот и корупцијата, од договорот мигранти за пари, од катастрофалната економска политика и намерната изолација на земјата надвор од ЕУ.

Разоткирени се. Знаеме се. Ова нема да им помине“.