Македонија
Полкот за специјални операции со вежба за војување во зимски услови на Попова Шапка
Спасување ранет во зимски услови, пренесување болен по снег во планина, преноќување во „мечкина дупка“, потрага по затрупани во лавина се дел од вежбите што војниците од баталјонот за специјални намени „Волци“ на АРМ, во соработка со американски војници ги изведоа во среда.
Вештините ги вежбаат на Попова Шапка, со цел подобрување на обученоста на декларираните тимови на Полкот за специјални операции за војување во зимски услови, а во среда ги покажаа пред министерот за одбрана Фатмир Бесими, пред началникот на Генералштабот, Горанчо Котески и заменик-амбасадорот на САД во Македонија, Брајан Агелер.
Покрај планираните четири вежби, Котески им нареди на војниците да влезат во приготвените мечкини дупки со полна опрема и во најбрзо време да тргнат во акција во полна борбена готовност.
Им забележа неколку ситници на кои не внимавале, како на пример за црните јажиња за спуштање на носилките, кои требало да бидат бели или скиите да се закопани потполно во снегот, а да им се гледаат само врвовите, додека војниците се во скривалиштата, но и дека пушката треба да им е во бела навлака.
И самиот влезе во едната „мечкина дупка“, каде во зависност од големината може да преспијат тројца до шест војници една вечер или да изградат игло, за останување повеќе од десет дена.
„Дојдовме да видиме како се одвиваат вежбите од страна на припадниците на АРМ, на Полкот за специјални операции заедно со специјалните единици на Армијата на САД. Ова е еден проект на поддршка и соработка со САД со кои имаме долгорочна соработка како стратешки партнер, на патот кон осовременување на АРМ, согласно највисоките стандарди на НАТО. Овие единици се пријавени за меѓународни мисии, каде АРМ ги има постигнато највисоките резултати“, рече министерот Бесими.
Началникот на Генералштабот на АРМ, Горанчо Котески, појасни дека денешната вежба е дел од повеќето што ќе се одвиваат во 2013 година во соработка со Армијата на САД.
„Фокусот на вежбата е усовршување на припадниците на специјалните единици во делот на стекнување вештини на скијање, евакуација на повредени во зимски услови и други борбени дејства во зимски услови. Издадов дополнителна наредба вежбите да се изведуваат на целата територија на Македонија, со цел војниците да ја запознаат територијата, но и за да се воспостави подобра соработка меѓу институциите од различни краишта“, рече Котески.
„ЈСЕТ е програма за соработка на специјалните сили на Македонија и специјалните сили на САД. Ова е 11-та по ред обука што се организира во Македонија. Целта е да се разменат искуства, да се научат нови методи“, рече полковникот Павле Арсовски командант на специјалните сили.
Според Џон Хеген, командант на специјалните единици од Армијата на САД, овие подготовки ќе им помогнат на војниците за изведување на акциите во Авганистан, каде има многу планини.
„Како војници сакаме да научиме нешто повеќе од други војници. Ова е еден дел од обуката на вежби во зимски услови, а потоа продолжуваме на полигонот во Криволак, каде ќе се обучуваме за постапување во урбана средина“, рече Хеген.
Обуката меѓу армиите на Македонија и Соединетите американски држави се реализира во периодот од 1-ви до 28-ми февруари, и тоа на две локации. Првиот дел од обуката „Борба во зимски услови“ се реализира на Попова Шапка, во периодот од 4-ти до 8-ми февруари, а вториот дел од обуката „Индивидуална обука/ борба во урбана средина“, ќе се реализира на АП „Криволак“ од 11-ти до 22-ри февруари./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левица ветува изградба на споменик за бранителите од Вејце
Политичката партија Левица вели дека ако дојде на власта ќе изгради во Вејце споменик во помен на загинатите бранители, кои несебично се жртвуваа во војната во 2001 година.
„Масакрот од 2001 година во село Вејце останува дел од колективната меморија на Македонците како најголем пораз на државните институции од група на терористи, кои ден денес немаат праведна судска разврска, туку напротив истите тие кои ги направија овие злосторства беа амнестирани и наградени со удобни фотелји.
Делегација на Левица на 28 Април ќе положи свежо цвеќе за сеќавање на жртвата на осуммина припадници на специјалната единица “Волци” кои беа убиени, масакрирани и живи запалени на истиот тој ден пред 23 години.
Проектот го изготви м-р Андреа Јанков, координатор на секторот за Урбанизам и локална самоуправа на Левица“, велат од партијата.
Македонија
Маричиќ: Евроинтеграцијата е премногу важна цел за да се потклекне пред предизвиците
Првиот заменик претседател на Владата за европски прашања Бојан Маричиќ ја пречека Вицепремиерката за европски прашања на Република Молдавија Кристина Герасимов. По остварената средба во Секретаријатот за европски прашања, Вицепремиерите одржаа заедничка прес конференција во Владата на Република Северна Македонија.
На прес конференцијата Вицепремиерот Маричиќ ја пренесе заедничката определба на двете држави што побргу да го завршат процесот за преговори за членство во ЕУ. Во продолжение интегралната изјава на Вицепремиерот Маричиќ.
„Откако на Самитот на ЕУ во Шпанија минатата година беше утврдена целта дека следното проширување на ЕУ е позиционирано до 2030 година, и откако Европскиот Совет донесе одлука да ги отвори пристапните преговори со Молдавија и Украина, Северна Македонија и Молдавија имаат заедничка цел. Со тоа стануваме и стратешки сојузници.
Република Молдавија сега го отпочнува скрининг процесот, додека ние го завршивме успешно во декември минатата година. Успешниот скрининг е резултат на ангажманот на речиси илјада владини претставници и експерти од академскиот и граѓанскиот сектор, за што добивме признанија од страна на Европската Комисија.
На колешката Герасимов ѝ пренесов дека Северна Македонија ќе им го стави на располагање сето знаење и искуство од овој процес на нашите колеги од пријателска Молдавија. Исто како што ние ја добивме поддршката од Хрватска и Словенија, Србија и Црна Гора.
Тоа е европската солидарност. Тоа е израз на пријателство и поддршка како европски вредности.
И двете држави сериозно претендираме на членство при следното проширување до 2030 година. Тоа проширување добива на значење и во забрзување заради геостратешките и безбедносните аспекти, Но, исто толку сме свесни дека за членство во ЕУ мора да ги исполниме и објективните критериуми и стандарди. Секоја земја одделно со своите специфики и перформанси е повикана да ги постигне тие стандарди, но споделувањето на искуствата на тој пат е од огромно значење и секогаш добредојдено.
Исто така, имаме сериозна намера и подготвени сме да ги извлечеме најдобрите придобивки од Планот за раст, кој треба да донесе дополнителна динамика во евроинтегративните процеси на земјите претенденти за членство во ЕУ.
Креиран, како финансиска и политичка инвестиција во регионот, Планот за раст со шесте милијарди евра за Западен Балкан е подадена рака за забрзување на процесот за членство до 2030 година. Тоа е брза лента на патот на евроинтеграцијата. Планот за раст бара реформи од државите и од владите, а придобивките се во системските промени кои ги обезбедуваме низ тие реформи, во финансиските пакети за земјава и во економската интеграција во единствениот европски пазар.
Мораме да останеме силно посветени на европската реформа агенда, зашто само на тој начин, токму преку Планот за раст ќе си обезбедиме слободно движење на стоки, услуги и работници, пристап до Единствената платежна област, олеснување на патниот транспорт, интеграција во индустриските синџири на снабдување, интеграција и де-карбонизација на енергетските пазари, како и во дигиталниот единствен пазар.
На овој пат до членството во ЕУ, сите земји кои се во преговори или се кандидати се соочуваат со предизвици кои бараат одговорни одлуки. Северна Македонија сега е пред таков предизвик. Ние нема да се откажеме од донесувањето на потребните одлуки за да ги продолжиме започнатите преговори.
Со колешката Герасимов се согласивме дека евроинтеграцијата е премногу важна цел за да се потклекне пред предизвиците. За двете земји членството во ЕУ е приоритет во остварувањето на врвните државни интереси.
Македонија
„Не е законски да не е осигурана Клиниката, за тоа треба да преземе одговорност менаџментот“, кажа Демири
Министерот за здравство Илир Демири кажа дека штетата на Токсикологија е покриена, откако имаше хаварија со цевката за парно.
„Клиничкиот центар има заеднички служби кои се наменети за тоа, тоа им е примамрна обврска да се грижат за Клинички центар и за сите хаварии што можат да се случат. Хаваријата со цевката за парно е санирана уште вчера од страна на заеднички служби“, рече Демири.
Дали е потпишан договор или не, тоа се интерни договори на Клиниките кои морам да ги проверам, додаде министерот.
Во однос на болничарот кој требаше да биде суспендиран, Демири кажа дека има една голема неправда направена на Токсикологија, а тоа е необезбедување на согласност од страна на менаџментот на таа институција за обезбедување договори за 18 вработени кои се дел од медицинските процедури, кои веќе 4 месеци служат на таа институција, а не добиваат никаква економска надокнада.
„Во тек е изборна кампања, не сакам да се прекрши ниту една законска процедура, чекам да дојде извештајот на Инспекцискиот надзор кој ги има обврзано во тек на 5 дена менаџментот да најде решание за 18 луѓе кои работат, а не добиваат надокнада. Не е законски да не е осигурана Клиниката, за тоа треба да преземе одговорност менаџментот“, кажа Демири.
На новинарско прашање, министерот одговори дека економската директорка оди на работа и не се паркира на влезот на Клиниката.
„Не се точни наводите дека доаѓала на работа по четири саати, според моите сознанија“, додаде Демири