Членот на Извршниот комитет на ВМРО-Народна партија и претседателот на Општинскиот комитет на ВМРО-Народна партија на Велес биле приведени синоќа во Велес оти и се заканувале на советничката која од ВМРО-Народна партија преминала во ВМРО-ДПМНЕ, соопшти МВР.

Тие се налутиле бидејќи советничката Рајна Стојанова која добила мандат во Советот на општина Велес од редовите на ВМРО-НП, при конституирање на новиот состав на советот преминала во коалицијата „За подобра Македонија“ предводена од ВМРО-ДПМНЕ.

Близнаковски и се јавил на Стојанова уште вечерта на 12-ти април и почнал да ја навредува и да ја обвинува дека добила пари за да премине во другата партија.

Другиот дел претседателот на Општинскиот комитет на ВМРО-НП за Велес отишол кај неа дома и почнал да и’ се заканува  со зборовите „да знаеш ќе донесат специјалци од Бугарија и нема да помине сé така лесно, тоа ти е поздрав од Љубчо Георгиевски“.

Кај неа дома дошол и потпретседателот на Општинскиот комитет на ВМРО-НП и тројцата разговарале околу половина час.

Во неделата наутро претседателот на Општинскиот комитет ја известил дека вечерта ќе има состанок и и’ рекол и таа да присуствува на него.

Стојанова отишла на состанокот за да им ги објасни причините за нејзината одлука.

Близнаковски побарал од неа да го врати мандатот, но таа побарала да ги каже причините за нејзината одлука, а Близнаковски им рекол на сите да ја напуштат просторијата и со советничката останале тој и неговиот заменик.

Сопругот кој ја чекал пред објектот дознал дека останала сама со двајцата и веднаш повикал полиција.

Но жената рекла дека нема проблем и сака да ги разјасни недоразбирањата, па полицијата си заминала. Но Близнаковски почнал да и’ се заканува велејќи и’ „ти на мек тон не разбираш, ќе треба да ти кажам грубо, доколку не го вратиш советничкиот мандат ти и твојата фамилија ќе бидете искоренети, не си свесна што правиш и што ќе ти се случи, ќе дојдат луѓе од страна-знаеш од каде, од Бугарија“. Жената го напуштила Општинскиот комитет и го пријавила случајот во полиција.

Според ВМРО-Народна партија, Близнаковски бил приведен без никакво објаснување.

„ВМРО-Народна партија реагира на ваквиот однос од страна на полицијата и бараме да се однесуваат според законските обврски и да ги почитуваат загарантираните човекови права“ се вели во соопштението на партијата.

Близнаковски е ослободен, а против него е поднесена кривична пријава за загрозување на сигурноста./крај/мф/фф