Контролната улога на парламентот е од суштинско значење, а само силен и почитуван парламент може да ја контролира власта и да придвижи потребни реформи, порача во понеделник, претседателот на Собранието, Трајко Вељаноски.

„Само силен и почитуван парламент може да придвижи реформи во една држава и реално да врши контрола врз власта, а контролната улога на парламентите е од суштинско значење и таа не може да се остварува соодветно без постоење на независни регулаторни тела одговорни за заштита на граѓанските права и за контрола на работењето на јавната власт”, рече собранискиот претседател Трајко Вељаноски коj заедно со Европското движење во Македонија ја организираат дводневната Меѓународна конференција на тема „Европската интеграција низ соработката на парламентите, граѓанското општество и независните регулаторни тела во Југоисточна Европа”.

Вељаноски смета дека губи целата земја која собранието ќе стане обична алатка за груба меѓусебна политичка пресметка.

„Секоја држава минува низ периоди на демократски искушенија, па затоа мораме да бидеме целосно јасни во оној момент кога Парламентот ќе стане обична алатка за груба меѓусебна политичка пресметка губи целата земја. Во тој тажен момент на поткопување на основниот столб на демократијата и поредокот најмногу се изневеруваат граѓаните. Тогаш се доведува во прашање смислата на изборната компетитивноста и на политичката коректност, а конструктивноста станува мисловна именка”, рече Вељаноски.

Eвроамбасадорот Аиво Орав смета дека Парламентот има важна улога во секоја земја, без разлика дали е во ЕУ или не.

„Во тој контекст го поздравувам враќањето на опозицијата во Парламентот, учеството на локалните избори како резултати на договорот од 1 март и се надевам дека сите негови одредби ќе бидат имплементирани што е можно поскоро, а ова пред се се однесува на востановување анкетна комисија за случувањата од 24 декември и потпишување на меморандум за разбирање”, рече Орав.

„Платформите за регионален дијалог ќе ви овозможат мрежа од лекции и искуства за да учите од другите кои се соочувале со слични предизвици, а тоа го овозможува Процесот на соработка во ЈИЕ”, изјави американскиот амбасадор во Скопје, Пол Волерс.

Тој повтори дека владата на САД останува посветена да и помогне на Македонија во овој процес.

Вицепремиерот за евроинтеграции Фатмир Бесими рече дека работата врз пристапувањето на Македонија кон ЕУ не е должност само на Владата, бидејќи, според него, патот на европските интеграции не може да се изоди без активно учество и поддршка на сите политички актери./крај/мф