Конференција на шефовите на воено-разузнувачките служби од Западен Балкан (WEBDIAC 3), од 23 до 26 април се одржува во Скопје, во организација на Министерството за одбрана на Република Македонија.

На отворањето на конференцијата се обратија Државниот секретар во Министерството за одбрана Сашо Стефаноски и Началникот на Генералштабот на АРМ генерал-мајор Горанчо Котески.

Државниот секретар Стефаноски во обраќањето до учесниците на Конференцијата, потенцираше дека Република Македонија од нејзиното осамостојување и формирање како независна и суверена држава воспостави политики, развива стратегии и изгради систем кој ќе овозможи целосна НАТО и ЕУ интеграција.

Генералот Котески во излагањето ја истакна одличната соработка на полето на одбраната и безбедноста во регионот, каде таа е посебно интегрирана во рамките на Јадранската група, како модел за сеопфатна соработка и поврзување во сите сегменти на безбедносната политика во регионот.

При тоа, тој посебно се осврна на соработката во рамките на военото разузнување во услови на постоење на современи закани по безбедноста, при што нагласи дека размената на разузнувачки информации ќе помогне во јакнењето на заедничките напори во борбата против сите видови и облици на тероризам и закани против државите, но и во зачувувањето на безбедноста на граѓаните.

Конференцијата на шефовите на воено-разузнувачките служби од Западен Балкан е трета по ред која се одржува во земјите од регионот на Западен Балкан, а годинава покрај претставниците на Министерството за одбрана од Република Македонија, учествуваат и претставници од: Албанија, Босна и Херцеговина, Бугарија, Хрватска, Грција, Италија, Косово, Црна Гора, Словенија, Турција, САД, Штабот на НАТО од Брисел, Канцеларијата за врски на НАТО во Македонија, Здружената разузнувачка ќелија на НАТО, Команда на силите на САД во Европа и Националниот разузнувачки Универзитет од Вашингтон. /крај/со/мф