Целокупната јавност и скопјани вчера имаа можност да видат како е наместен тендер во јавното претпријатие Водовод, во вредност од 300.000 евра, каде што фирмите КБК Инженеринг и Кодинг 2, во јули 2020-та година започнале реконструкција на водоводна мрежа на ул. „Варшавска“, во август ја завршиле, а целиот тој период фирмата КБК Инженеринг и Кодинг 2 работеле без договор, односно без да има најповолен понудувач, изјави денеска на прес-конференција портпаролот на ВМРО-ДПМНЕ, Димче Арсовски.

„Вчера јавното претпријатие Водовод и директорот Весковски признаа кривично дело, со тоа што во документите што ги пратија самите за избор на најповолен понудувач се гледа дека изборот е вршен на 01.10.2020 година. Целата реконструкција на водоводната мрежа е завршена месец ипол претходно. Фирмата КБК Инженеринг најверојатно во непосреден договор со ЈП Водовод и градските власти договориле да отпочнат и да сработат, што само по себе е кривично дело, да се заврши реконструкција на водоводна мрежа, а дури потоа да има избор на најповолен понудувач и баш тоа да е фирмата која што ја завршила работата претходно“, додаде Арсовски.

Денеска како што рече ќе изнесе нови докази дека е работено без договор за најповолен понудувач.

„На ден 24-ти јули 2020 година јавното претпријатие бара надзор над изградба конкретно за реконструкција на постоечки водовод од ул. „Варшавска“. На барањето за надзор јасно пишува дека изведувач на работите ќе биде фирмата КОДИНГ 2 ДООЕЛ Скопје. Поголем доказ од ова дека си избрале во јули месец самите меѓу себе која фирма ќе работи, нема и не може да има. На 24-ти јули во писмен официјален документ на јавното претпријатие пратен до друга институција кажуваат која фирма ќе работи, односно веќе работи, без да има избор на најповолен понудувач помеѓу петте фирми кои што го добиле тендерот односно ја потпишале рамковната спогодба во април 2020-та година“, објасни Арсовски.

Доказ број 2, како што рече, е евидентниот лист за хлорирање од 24-ти јули, кој го потпишал раководителот на секторот за технички работи и развој на ЈП Водовод, каде што пишува дека мрежата може да се хлорира. Се хлорира секоја мрежа веднаш после одредена реконструкција на истата водоводна мрежа.

Доказ број 3, според портпаролот на ВМРО-ДПМНЕ, е извештајот од тестирање квалитет, односно дезинфекција на мрежа, од 29-ти септември, каде што се врши испитување дека водата е питка и може да се пие, што повторно потврдува дека реконструкцијата е завршена пред да биде изборот за најповолен понудувач.

„Ова е на 29-ти септември, а изборот за најповолен понудувач се случил електронски на први октомври 2020-тата година. Како е можно баш фирмата КБК и Кодинг 2 да имаат најниска цена на први октомври, откако е завршена целата работа, а другите четири фирми да немаат забелешки и жалби по основ на самиот тендер? Очигледно е дека на двоецот на Шилегов – Весковски заедно со КБК Инженеринг и Кодинг 2 им било претходно договорено фирмата да изработи за потоа да го добие тендерот кој што јасно се гледа согласно вчерашната прес конференција, согласно денешните три докази кои што ги покажавме дека тендерот за избор на најповолен понудувач помеѓу петте фирми од рамковната спогодба е наместен“, посочи Арсовски.

Од утре до четврток нашето подрачје ќе биде под влијание на значително постудена воздушна маса, времето ќе биде променливо облачно и значително посвежо, информира УХМР.

Ќе дува умерен до засилен ветер од северозападен правец. Дневните температури ќе опаднат за околу 10 степени, а од четврток и утринските ќе бидат особено ниски, на некои повисоки места може да се спуштат и до 0 степени.

Од петок ќе има пораст на дневните температури.

Заменик-претседателот на Владата задолжен за европски прашања Никола Димитров денеска имаше средба со тимот од Естонскиот центар за меѓународен развој и претставници од Амбасадата на САД во земјава, со што официјално се означи почетокот на проектот насочен кон унапредување на дигитализацијата на Северна Македонија, а кој се спроведува со финансиска поддршка од Естонија и САД, соопштија од Министерството за надворешни работи.

На средбата беа реафирмирани целите на проектот и беа прецизирани активностите кои ќе се спроведуваат во следниот период, при што вицепремиерот Димитров ја нагласи важноста на процесот на дигитализација во контекст на процесот на европска интеграција и се заблагодари за партнерството и поддршката со кои се унапредува принципот на добро управување.

„Дигитализацијата е важен аспект од процесот на европеизација бидејќи ќе се подобрат квалитетот и ефикасноста во обезбедувањето услуги за граѓаните, ќе се осигури континуитетот и непречена работа на институциите, но воедно е и успешна алатка во борбата против корупцијата. Пренесувањето на естонското искуство во соработка со стратешки партнер како што е САД е одлична можност да создадеме успешна дигитална приказна во Северна Македонија“, истакна Димитров.

Овој проект претставува прва трилатерална соработка меѓу Северна Македонија, Естонија и Соединетите Американски Држави, насочено кон поддршка на процесот на приближување кон европските стандарди и напредок во европската интеграција.

Во рамки на посетата, претставниците од Естонскиот центар за меѓународен развој ќе остварат средби со повеќе институции, меѓународни донатори, претставници од приватниот и граѓанскиот сектор кои се активни чинители во областа. Целта на овие средби е мапирање на состојбите во врска со дигитализацијата на процесите и услугите, како појдовна точка за понатамошно спроведување на проектот, а в петок, 24 септември, ќе се одржи и прес-конференција за претставување на проектните цели и активности.