На социјалните мрежи лидерот на Левица Димитар Апасиев бара оставка од министерот за внатрешни работи Панче Тошковски по несреќата во Кочани.

„После вчерашната експликација за одговорноста на Градоначалникот на Кочани, денес продолжуваме со правни аргументи зошто и Министерството за внатрешни раноти, на чело со министерот, сноси одговорност за ситуацијата со дискошталата.

Согласно чл. 21, ст. 1, ал. 4 од Законот за угостителска дејност (Сл. весник на РМ бр. 62/2004), кој досега е менуван дури 15 пати, МВР дава согласност за објектот дека ги исполнува условите за заштита на јавниот ред и мир + за безбедност во сообраќајот [паркинг и сл.].

Но, покрај оваа изрична законска надлежност, Министерството со кое раководи Панче Тошковски – во јавноста попознат и како „адвокатот на урбаната мафија“ – има и дополнителни ингеренции за дискотеки и кабариња – и тоа:
– проверка на работно време;
– проверка на пиротехнички средства;
– проверка на гласност и бучава;
– проверка на присуство на малолетници (и точење алкохол);
– проверка на наркотични супстанци и др.

Така да, министре – и да не сте директно кабает со непосредна вина, во крајна линија имате политичка и правна одговорност за овој случај, затоа што вие сте министер од јануари 2024, а фалц-лиценцата е обновена во март 2024 – што значи токму во времето на Вашето министерување“, пишува Апасиев.

Оттука, како што додава, според него смената на командирите и началниците на СВР и ОВР „не е доволна и е жртвување пион за кралица. Потребно е да покажете доблест и да си поднесете неотповиклива оставка од морални причини“, нагласува Апасиев.

Во овие тешки денови, кога целата земја тагува поради трагедијата што ја погоди Кочани, упатуваме апел за разбирање и поддршка кон учениците кои минуваат низ тежок емоционален период, порачува Сојузот на средношколците.

Многу млади, како што велат, чувствуваат потреба да ја изразат својата солидарност преку учество во собири и иницијативи за поддршка. Во овој контекст ги повикуваат образовните институции да покажат емпатија и разбирање за учениците, без да се соочуваат со санкции или дополнителен притисок во наставата.

„Ова се моменти кога хуманоста треба да биде на прво место.

Истовремено, изразуваме загриженост за односот кон учениците во овој чувствителен период. Наместо строги мерки, сега се неопходни дијалог, поддршка и заедничко разбирање. Протестите се крајна мерка, која никој не ја посакува, но доколку изостане разумен пристап, реакцијата на учениците ќе биде неизбежна.

Очекуваме сите училишта и надлежни институции да придонесат кон создавање атмосфера на грижа, почит и поддршка, со цел учениците полесно да се справат со овие исклучително тешки моменти“, потенцираат од Сојузот на средношколците на Македонија.

Општина Илинден ќе донира 500.000 денари за настраданите во пожарот во Кочани. По трагичниот пожар што ја зафати дискотеката „Пулс“ во Кочани на 16 март 2025 година, при што загинаа најмалку 59 лица, а над 190 се повредени, градоначалникот на Општина Илинден, Александар Георгиевски, изрази длабоко сочувство и солидарност за погодените семејства и предложи до Советот на општината, Општина Илинден да донира 500.000 денари од општинскиот буџет за помош на настраданите семејства.

Во знак на поддршка, Општината одлучи да ги донира овие финансиски средства во Фондот за солидарност на Црвениот крст на Република Македонија, со цел да се обезбеди директна помош на погодените семејства.

Градоначалникот Георгиевски истакна дека оваа донација е мал гест на солидарност кој има за цел да им помогне на семејствата погодени од оваа тешка трагедија. Тој изрази надеж дека овие средства ќе придонесат за пребродување на тешката ситуација во којашто се наоѓаат семејствата погодени од оваа катастрофа.

Оваа најнова донација е само еден од многуте примери за посветеноста на општината кон заедницата и солидарноста во време на криза. Општина Илинден продолжува да ги поддржува хуманитарните активности, редовно учествувајќи во донации и помош за оние на кои им е најпотребно.