Системот „Национален систем за електронска евиденција во здравството“ односно електронските рецепти се одложуваат за на 1 август, поради проблемите и недостатоците со кои се соочија во понеделник и граѓаните и лекарите и аптекарите.

„Денешниот ден ќе го сметаме како пилот фаза од која ќе се исцрпат сите проблеми коишто треба да ги решиме. Од утре работата ќе продолжи, како и до вчера, односно на тест основа, а повторно системот ќе се стави во продукција на 01. август, до кога сите недостатоци треба да бидат отстранети“ соопштуваат од Министерството за здравство.

Во понеделник обичните хартиени здравствени рецепти беа заменети со електронски, или рецепти на кои покрај името на лекот постои и код под кој во аптека истите ќе бидат издавани. Но се појавија проблеми во системот, па некои лекови препишани на електронски рецепти не било можно да се подигнат од аптеките

„Во текот на денешниот ден се забележани неколку маргинални проблеми со истиот, и за истите би сакале да им се извиниме на сите оние кои поради овие недостатоци имале непријатности во реализацијата на нивните потреби и истите ги реализирале со потешкотии или не успеале воопшто“ велат од Министерството.

Според нив, ова е прв и единствен засега ваков огромен систем, кој се имплементирал во кој било здравствен систем воопшто.

„Денеска имавме максимален број на реализирани разменети податоци, над 1.500.000 податоци што претставува убедливо најголем број разменети податоци во единствен систем во историјата на Република Макодонија. Проблемите коишто беа детектирани најмногу се должат на неусогласеноста и неоптимизираноста на програмските пакети коишто ги користат лекарите од примарна здравствена заштита со софтверот на Министерството. Поради ова, денеска во 18 часот е свикан итен состанок со сите програмерски куќи со цел надминување на овие проблеми. Сакаме да потенцираме дека за време на тест периодот до денешниот ден системот функционираше беспрекорно, но за да можеме да ја имаме вистинската слика за потребите и успешноста на системот, мораше во реално време да се имплементира, при што целиот здравствен систем мораше да го користи истовремено“ соопштуваат од Министерството./крај/со/фф