Македонија
Началникот на ГШ на АРМ се сретна со командантот на Националната Гарда на Вермонт

Во рамките на повеќедневната посета на САД и Вермонт, НГШ на АРМ генерал-мајор Горанчо Котески, во понеделник се сретна со својот домаќин Командантот на Националната Гарда на Вермонт генерал-мајор Стивен Креј и имаше заеднички разговори со штабот на Националната Гарда.
За време на средбата Котески и генералот Креј го искажаа заедничкото задоволство од досегашната соработка, особено во делот на обуката и реализираните вежби, како и од заедничкото распоредување во мисијата ИСАФ во Авганистан.
Генералите ја искажаа потребата од проширување на соработката и на регионално ниво, истакнувајќи ја можноста од реализација на заеднички вежбовни активности на армискиот полигон Криволак помеѓу армиите на земјите на САД – Јадранската повелба и нивните партнери националните гарди на сојузните држави на САД.
Во делот на операциите, посебен акцент беше даден на учеството и статусот на мисијата ИСАФ во Авганистан, каде се отвора нова можност за заедничка соработка и учество со тимови за асистенција и обука во пост ИСАФ мисијата „Решителна поддршка во Авганистан“.
На состанокот, Генералот Креј ја истакна подготвеноста капацитетите за обука и едукација на националната гарда на Вермонт да бидат на располагање и за припадниците на Армијата на Република Македонија.
Посетата на Вермонт продолжува во текот на денешниот ден во Монтпелиер каде генерал-мајор Котески ќе оствари средби со заменик гувернерот Фил Скот, членовите на Комитетот за безбедност на парламентарниот дом на Вермонт, а ќе го посети и Центарот за менаџмент со кризи. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова го прими Ристо Дурловски, претседател на организацијата „Обединети Македонци во Канада“

Претседателката Гордана Сиљановска-Давкова денеска го прими Ристо Дурловски, претседател на организацијата „Обединети Македонци во Канада“.
На средбата, таа уште еднаш ја потврди својата определба за формирање на Совет за дијаспора, како политички исчекор во соработката меѓу државата и дијаспората. Во Советот, претседателката гледа институционален одговор на потребата од засилена и продлабочена комуникација со нашите иселеници во сите области.
Дурловски истакна дека примарна цел на Организацијата останува да биде промоцијата и заштитата на правата на Македонците во Канада, како и нивната интеграција во канадското демократско општество. За него, македонските корени се силна мотивација за поддршка на македонските национални интереси.
Соговорниците се согласија дека бројната македонска дијаспора може да биде фактор на зајакнување на канадско-македонските политички, економски, културни и други односи.
Македонија
Од утре авионско и терестрично прскање против комарци во Скопје

Градот Скопје ги известува граѓаните дека утре ќе започне авионска дезинсекција на подрачјето на градот Скопје, против возрасни форми на комарци, а на 16 септември терестрична дезинсекција против возрасни форми на комарци и ларви од комарци, односно:
1. Авионската дезинсекција на подрачјето на градот Скопје, против возрасни форми на комарци, ќе се одвива на 12.09.2025 (петок) и на 13.09.2025 (сабота), во раните утрински часови.
2. Терестричната дезинсекција на подрачјето на градот Скопје, против возрасни форми на комарци и ларви од комарци ќе се одвива од 16.09.2025 (вторник) до 19.06.2025 (петок), во период од 22.00 до 03.00 часот, наредниот ден
Доколку временските услови не го дозволуваат вршењето на дезинсекцијата, истата ќе се изврши во истиот термин првиот нареден ден, кога временските услови ќе бидат поволни, додаваат од Градот Скопје.
Исто така се известуваат пчеларите навремено да ги преземат потребните мерки за заштита на пчелите.
Македонија
Зголемена фреквенција на возила на Табановце за излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. На ГП Табановце за излез од државата се бележи зголемена фреквенција на возила, времето на чекање е околу 30 минути.
На останатите гранични премини од македонска страна, нема подолги задржувања за влез и излез од државата, додаваат од АМСМ.