Членот на Комисијата за верификација на фактите, Чедомир Дамјановски на 4 јуни пријавил во полиција дека непознато лице му се јавувало и му барало 10.000 евра.

Не се знаат мотивите за заканите ниту, пак, било познато дека Дамјановски имал нерасчистени должничко-доверителски односи со лицето кое му се заканувало телефонски.

„Министерството за внатрешни работи постапува крајно неселективно по сите пријави, обидувајќи се во рамки на законските ингеренции да ги документира кривичните дела, доколку за истите постојат докази. Веднаш по добивањето на пријавата, полицијата започна да постапува. Набргу беше утврден идентитетот на осомничениот, а кон крај на минатата недела истиот беше обезбеден и повикан на службен разговор. Во разговорот, иако осомничениот потврди дека телефонот бил негов, посочи дека во спорното време, наводно го дал на две непознати лица кои се затекнале во спортската обложувалница во која што се наоѓал во моментот“, соопштуваат од МВР.

Осомничениот е 56 годишно лице од Скопје кое и претходно и е познато на полицијата. Откако случајот ќе биде целосно документиран, против него ќе следи соодветен поднесок

Дамјановски во вторник на прес-конференција објави дека телефонски добивал закани по животот, а за истите закани го обвини и претседателот на Комисијата, Томе Аџиев./крај/мвр