Македонскиот писател Божин Павловски под псевдоним „Прозаист“ од 60-тите до 80-тите години на минатиот век соработувал со тајните служби и кодошел врвни македонски имиња од областа на литературата, соопштуваат од Комисијата за верификација на фактите.

„Во повеќе досиеја, што се наоѓаат во Државниот архив, пронајдени службени белешки и други документи, кои потврдуваат дека лицето, најпрво било предмет на оперативна обработка заведено под псевдонимот “Прозаист” , а почнувајќи од 60-тите години на минатиот век и истовремено додека бил предмет на оперативна обработка, на поранешните тајни служби им давал информации за врвни македонски имиња од областа на литературата, кои од поранешните тајни служби биле предмет на обработка и осомничени дека, наводно, настапувале од позиции на македонски национализам, анархолиберализам или граѓанска десница.Согласно законските одредби, името на лицето и документите ќе бидат објавени во рок од три дена“ се вели во соопштението на Комисијата.

На седницата и формално биле потврдени одлуките на Комисијата, донесени на неколку претходни седници, за 12 други лица кои биле прогласени за наредбодавци или соработници на поранешните тајни служби, но чии лични податоци требаше дополнително да се утврдат.

Притоа, заклучено е дека шестмина од нив се веќе починати, а други шестмина се живи. Личните податоци и документите за живите лица ќе бидат објавени во рок од три дена на веб-сајтот на Комисијата.

Документите за Павловски ќе бидат објавени во рок од три дена на интернет страницата на Комисијата. Павловски револтиран од процесот на лустрација пред два дена се откажа од членството во МАНУ и ДПМ./крај/со/фф