Премиерот Никола Груевски со писмо се обрати во понеделеникот до претставникот на ОБСЕ за слобода на медиумите, Дуња Мијатовиќ, во кое се заблагодарува на нејзиниот итнерес искажан со претходниот нејзин допис за судскиот предмет и мерката притвор изречена на новинарот Томислав Кежаровски, и притоа посочува дека претпоставките на кои ги таа ги темелите тезите и залагањата, не целосно кореспондираат со фактичката состојба, како и со правниот поредок и овластувањата кои ги има извршната власт

„Дозволете ми најнапред да истакнам дека Владата на Република Македонија во целост се залага за почитување на принципот на владеење на правото и за целосно почитување на принципот на поделба на државната власт на законодавна, извршна и судска како темелни вредности на уставниот поредок на земјата (член 8 од Уставот на РМ). Како претседател на Владата обрнувам особено внимание за доследно почитување на начелото на еднаквост на граѓаните, не само затоа што тоа претставува еден од основите на граѓанските слободи и правата утврден во Уставот на Република Македонија (член 9 став 2 од Уставот), туку и затоа што еднаквоста е еден од столбовите на демократските политички системи. Еднаквост во правата, но и еднаквост во обврските“, се посочува во одговорот на премиерот Груевски.

Според ова, како што дополнува Груевски искажувајќи надеж дека претставникот на ОБСЕ за слобода на медиумите ќе се согласи, не би смеело да се дозволи поедини граѓани да имаат привилегиран третман во однос на почитувањето на обврските кои им се налагаат со одделни закони, во зависност на тоа со каква професија се занимаваат.

„Ниедна професија не смее да биде амнестирана од законот, вклучувајќи ја тука и професијата новинар, која по својата благородност и значајност за демократските процеси во една држава можеби предничи во однос на повеќето професии. Исто така, се надевам дека ќе се согласите со мене дека начелото на поделба на власта не дозволува на извршната власт да интервенира и дерогира одредени судски одлуки, колку и да не се согласува со истите и колку и да таквите одлуки можат да наштетат на имиџот на земјата“, нагласува македонскиот премиер во дописот до Мијатовиќ.

Укажува и дека во врска со предметот на Кежаровски, постојат, како што вели Груевски, одредени моменти во содржината на писмо од Мијатовиќ кои ја „замаглуваат фактичката состојба и кои на Вашите добри намери им даваат погрешен правец“.

„Се согласувам со Вас дека затворањето новинари за нивното пишување не е прифатливо во едно демократско општество, како што велите во Вашето писмо, но дозволете ми да истакнам дека г-дин Кежаровски не е притворен поради неговото пишување, туку затоа што е обвинет за повреда на Законот за заштита на сведоци, што е пропишано како кривично дело во наведениот закон“, се вели во писмото на премиерот и притоа се додава дека системот на заштита на сведоци претставува значајна алатка во борбата со криминалот и не смее да се дозволи ваквиот систем на каков и да е начин да се корумпира. Притоа Груевски посочува на примерот на Хашкиот трибунал кон ова прашање, и за тоа колку е значајна заштитата на сведоци, кој покрена постапки и осуди четворица новинари за откривање на идентитет на заштитен сведок.

„Оттука, потребно е со особено внимание да се разгледуваат сите случаи на повреда на овој закон и да не се дозволи да се врши било каков притисок на правосудните власти при третирањето на предмети со вакви кривични дела. Во оваа насока, би сакал да го искажам своето мислење дека е непримерно да се доставува копија од ова писмо на претседателот на Кривичниот совет на Основниот Суд Скопје I, бидејќи колку и да е тоа добронамерно, истото може да биде сфатено како своевиден притисок на судот, што верувам не е Ваша интенција“, се вели уште во писмото.

Од тие причини, нагласува Груевски, непримерно е да се бара асистенција од него како премиер на Мијатовиќ да и’ биде дозволена посета на Кежаровски во притворот. Упатува дека посетата на притвореници е прецизно регулирана со Законот за кривична постапка, каде што таксативно е наведено кој може да посети притворено лице.

„Јас не би се осмелил да судам дали Вие имате право или не да го посетите, туку само би истакнал дека е потребно да се подари верба во надлежните судии, кои се единствено овластени да одлучат кому може да му се дозволи да направи посета и дека секоја интервенција на извршната власт би го поткопала уставниот поредок на земјата и би ги загрозила основните вредности на едно демократско општество“, прецизира Груевски.

Премиерот истакнува и го убедува претставникот на ОБСЕ за слобода на медиумите, дека Владата, како и во сите судски предмети, „целосно се држи настрана од предметот на Томислав Кежаровски“.

„И покрај тоа што поедини структури се обидуваат да го исполитизираат овој предмет, и покрај тоа што истиот може да се злоупотреби за нарушување на имиџот на Република Македонија, Владата принципиелно ќе продолжи да се држи на страна но и внимателно да го следи текот на судската расправа по овој предмет, бидејќи тоа е единствениот правилен и можен начин за постапување“, порачува на крајот премиерот Груевски./крај/мф/сн