Избирачките списоци да се проверуваат на терен преку прашалници, со цел да се регистрира точноста на податоците во нив, препорача во стратегијата, во петок експертот на ОБСЕ, Џон Арон, пред членовите на Државната изборна комисија.

Истражувањето кое би се спровело во одредени избирачки места, и на околу 20.000 испитаници, треба да ги потврди или демантира сомнежите околу квалитетот на списоците, како што е можноста веќе починати лица сè уште да имаат право на глас.

Да се утврди дали постојат гласачи со право на глас, а не се заведени во избирачкиот список, како и можноста од двојност во гласањето, кога едно лице гласа во две различни избирачки места.

Големата диспропорционалност во бројот на гласачи регистрирана по изборни места, Арон ја истакна како сериозна. Имено, просечниот број на гласачи во едно место се движи околу 800. Во Чаир, на едно место има регистрирано 200-300 гласачи, а на друго 1.110 до 1.200 гласачи. Според него, тоа е неверојатно и треба добро да се провери.

Истражувањето треба да ги опфати и адресите, на кои се наоѓаат голем број гласачи, бидејќи воочено е на една адреса да има од 100, па дури и неколку илјади гласачи. Но, ова, според него, веројатно се работи за села, каде што граѓаните не се заведени под одредено име на улица и број. Прашалникот би опфатил различни етнички групи и би се спроведувал околу една недела.

Истражувањето ќе го опфати и проблемот со евентуалната појава на лица кои се во списокот, но не живеат во државата. Во проверката нема да бидат опфатени потешкотиите за попишување на гласачите од дијаспората.

Препорачува оваа проверка да се спроведе најдоцна три месеци по завршувањето на претседателските избори во март.

Дамјан Манчевски од СДСМ смета дека тоа може да се направи и пред изборите, доколку има политичка волја.

Никола Тодоров, како претставник на ВМРО-ДПМНЕ, рече дека не е утврдено дали тие луѓе што ќе одат на терен ќе имаат право да ги легитимираат граѓаните.

Претставничката на Дирекцијата за заштита на личните податоци рече дека секое мешање на политичките партии во Избирачкиот список, би се сметало за кршење на Законот./крај/мф