Договор за продлабочување на соработката во борбата против организираниот криминал, посебно во делот на недозволена трговија на дрога, криумчарење мигранти и компјутерски криминал, потпишаа во четврток во Брисел министрите за внатрешни работи на Македонија и на Белгија, Гордана Јанкулоска и Жоел Милке.

Со договорот се отвара можноста во иднина македонските возачки дозволи да бидат признаени во Белгија.

„Денеска потпишавме многу важен договор за Министерствата за внатрешни работи на Република Македонија и на Белгија оти истиот е правна основа за полициска соработка меѓу двете земји кои ги дефинираат клучните области во кои постои широко поле за продлабочување на соработката. Овој договор овозможува директна, непосредна соработка меѓу полициите од двете земји во однос на прашањата од клучен интерес, а кои претставуваат глобални проблеми и закани за светот во денешницата. Договорот ќе ни овозможи да формираме заеднички истражни тимови што ќе работат на прашања поврзани со глабалните закани како што се сајбер-тероризмот, тероризмот, недозволена трговија со дрога и оружје и луѓе и продлабочување на полициската соработка во областа на организираниот криминал“, рече министерката Јанкулоска по официјалното потпишување на договорот.

Според Јанкулоска, важноста на договорот е поголема и поради тоа што истиот е прв договор од ваков вид меѓу Македонија и Белгија и значи широко поле за понатамошни нови иницијативи кои би се однесувале и во заедничкиот тренинг и усогласување на најдобрите практики на полициите на двете земји.

„Веруваме дека овој договор ќе значи нов дополнителен импулс во нашата соработка и во периодот што следи. А, со министерката Милке се договоривме веднаш да креираме акциски планови во однос на приоритетните задачи и да почнеме да постапуваме без никакво одлагање“, додаде Јанкулоска.

Шефицата на белгиската полиција, пак, потенцира дека Македонија, направила големи напори за реформи во делот со лажните азиланти.

„Има некои тешкотии и треба да се справиме со овој вид на проблеми, но во моментов нема зголемување на овој проблем, иако треба да ги решиме постоечките проблеми, потенцира Милке. /крај/со/мф