Македонија
Почина сопственикот на МТМ телевизија

По неколкумесечно боледување, почина сопственикот на скопската телевизија МТМ, Стојан Давчев.
Роден е во 1945 година во штипското село Сарчиево. Дипломирал на Електро-техничкиот факултет во Белград на отсекот електроника и телекомуникации во 1969 година. Од 1982 година е соспственик и генерален директор на фирмата ДАСТО, а од 1992 и на Телевизија МТМ. Пред тоа стекнува работно искуство како електро инженер во секторот телекомуникации, а од 1970-1981 раководи со секторот на среднобранови предаватели во Радио Телевизија Скопје. Својата стручност како електро инженер ја доусовршува во повеќе реномирани светски компании за телекомуникации.
Стојан Давчев е истакнат бизнисмен и менаџер, кој повеќе од 30 години успешно опстојува на територијата на бивша Југославија, на Балканот, во Европа, Азија, Африка, САД и Канада. Со својата визија и мисија за развој на телекомуникациите во регионот и пошироко, создаде компанија која повеќе од три децении е водечки производител на повеќе од 400 различни производи наменети за професионална телекомуникациска опрема. Негово дело се компаниите Дасто, МТМ, Дасто Семтел, Дасто Бетел, Дасто Монтел и Дасто Амтел.
За својата работа и стручност има добиено многу награди, дипломи, благодарници и највискоки професионални признанија. Во 2010 година доби плакета за значајни остварувања поврзани со високообразовната, научноистражувачката и културната дејност, како и за афирмација на универзитетот „Св.Кирил и Методиј“ во Македонија и во странство. Повеќе години беше претседател на Надзорниот Одбор на Стопанската комора на Македонија, а покрај придонесот за стопанството во земјата, беше и голем општественик.
Го врати духот и животот во неговото родно Сарчиево со големиот проект, обновата на селската црквичка во респектабилен манастирски комплекс „Света Петка“, каде двапати беше постигнат Гинисов рекорд за најголем котел сварен грав, манифестација по која за Сарчиево и Македонија се слушна надалеку во светот.
Комеморацијата во негова чест ќе се одржи в сабота од 10 до 11 часот на градските гробишта Бутел, а ќе биде погребан во манастирот „Света Петка“ во Сарчиево во 13 часот./крај/со
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: Пожарот во Самоков веднаш изгаснат, објектите на фабриката не беа во опасност

Пожарот во Самоков е локализиран и веднаш изгаснат. Во ниту еден момент немаше опасност од негово ширење кон објектите на фабриката Самоков, соопшти Центарот за управување со кризи.
Од РЦУК Македонски Брод претходно стигна информација дека е настанат пожар во населбата Самоков, во фабриката „Сувенир“, а опожарен е магацин со хемикалии. Во информацијата беше наведено дека електричната енергија во фабриката е исклучена.
Македонија
„Седи Боби, кец!“, му рече Арсовска на Стефковски за проблемот со водата, па доби одговор

Градоначалничката на Град Скопје, Данела Арсовска, преку објава на својот официјален профил на Фејсбук, му возврати на градоначалникот на општина Гази Баба, Бобан Стефковски, кој претходно ги прозва Градот и ЈП „Водовод и канализација“ – Скопје, за прекините во водоснабдувањето во неколку скопски населби. Тој побара итна интервенција од Градот, предупредувајќи на можни протести ако состојбата не се реши веднаш.
Арсовска му одговори на Стефковски дека и по три години на функција сè уште не прави разлика што е во надлежност на Градот, а што на Општина Гази Баба. Таа појасни дека жителите на Црешево и Смилковци не се корисници на ЈП „Водовод и канализација“, туку на ЈКП „Гази Баба“ – претпријатие под општинска надлежност.
„Ова по три години ќе го знаеше ако паузираше еден ден од сликање по фолклорни манифестации за да сработиш нешто“, напиша Арсовска, посочувајќи дека со средствата добиени од владите на Ковачевски и Мицкоски, Стефковски можел да изгради нова водоводна мрежа за тие населби.
Во продолжение, Арсовска рече дека Град Скопје во изминатите три години не добил ниту еден денар од централната власт, а дека Владата ѝ должи на ЈСП Скопје осум милиони евра.
Градоначалничката ја заврши објавата со саркастичен тон: „Седи Боби, кец!“
Ситуацијата дополнително ја заостри реториката меѓу градоначалниците на Скопје и Гази Баба, отворајќи нова рунда меѓусебни обвинувања. По објавата на Арсовска, повторно се огласи Стефковски кој и’ одговори дека надлежноста за Смилковци и Црешево ја знае многу добро, па ја повика да каже зошто жителите од Автокоманда, Железара, Триангла, Маџари и Ченто немаат вода? За крај по однос на делењето оценки, Стефковски на социјалните мрежи напиша дека граѓаните и’ дале оценка на парламентарните избори на Арсовска. Тогаш таа освои вкупно 3.438 гласови.
Македонија
Гори кај Прилеп, Македонски Брод, Чашка и Велес – пресек на состојбата со пожарите

На територијата на државата се евидентирани вкупно осум пожари на отворен простор, од кои активни се четири, соопшти Центарот за управување со кризи.
Во Општина Прилеп, гори кај селото Бешиште. Се работи за приземен пожар во квалитетна мешана шума. Активен е пожарот и кај Општина Македонски Брод, с. Црешнево, м.в. Церо Поле – пожар во деградирана дабова шума и грмушки. Во Општина Чашка беснее шумски пожар под Солунска Глава, помеѓу местата викани Изворите на Бабуна и Бабина Дупка (моментално нема активен пламен, само чад на карпест дел). Во Општина Велес пожарот избувна во ниска вегетација.
Изгаснати се 4 пожари: Општина Врапчиште, с. Врањовци – ниска вегетација, ѓубриште; Општина Липково, с. Лојане – ниска вегетација и стрниште; Општина Карбинци, с. Радање – блок (површина) посеана со жито и ниска вегетација и ОпштинаАрачиново, с. Орланци – ниска вегетација и отпаден материјал.