Во рамките на продолжението на 84 та седница на Собранието на Република Македонија што се одржа во четвртокот со 61 глас „за“ пратениците го донесоа Законот за изменување на Законот за минимална плата во Република Македонија, по скратена постапка.

Министерот за труд и социјална политика Диме Спасов, истакна дека со него се предвидува од март годинава од сегашните 8.050 денари минималната плата да се зголеми на 8.800, во март 2015 година на 9.590 денари, а во март 2016 година на 10.080 денари.

Спасов нагласи дека за индустријата за производство на текстил, облека, кожа и кожни производи се предвидува подолгорочно воведување на законот.

„Од март годинава минималната плата во овие трудоинтензивни дејности ќе изнесува 7.500 денари, во март 2015 година 8.050, во март 2016-та 9.000, во март 2017 година 9.500 денари за во март 2018 година да достигне до 10.080 денари“, посочи Спасов.

Вкупното зголемување на минималната плата ќе биде за 25,2 проценти со што ќе изнесува 48 проценти од просечната плата потенцираше Спасов кој додаде дека во март годинава зголемувањето ќе изнесува 9,3 проценти, во март 2015-та за 8,98 проценти и во март 2016 година за дополнителни 5 проценти.

Со ова, според министерот, од моменталните 39,6 проценти од просечната плата ќе достигне до 48 проценти.

Кај трудоинтензивните дејности до 2018 година минималната плата ќе се зголеми за 47 проценти.

Марјанчо Николов од СДСМ нагласи дека неговата партија ќе го поддржи предлогот за измена на Законот, но забелешка имаше што за вработените во текстилната и кожарската индустрија повторно се предвидува минималната плата да важи по три години од донесувањето на законот./крај/мф/ап