Пратениците во Собранието на Република Македонија во четвртокот ги донесоа измените и дополнувањата на Законот за јавни патишта со 47 гласа „за“, а измените и дополнувањата на Законот за вработувањето и осигурување во случај на невработеност со 58 гласа, во рамки на продолжението на 85-та седница.

Пратеникот Панче Орцев од редовите на СДСМ рече дека Дополнетиот предлог закон за изменување и дополнување на Законот за јавни патишта тешко ќе се имплементира и ќе направи збрка наместо да ги расчистува ситуациите, а граѓаните наместо еднаш ќе треба два пати да плаќаат доколку возилото остане во дефект.

„Граѓаните кои плаќаат во сметката за регистрација нивното возило да биде отстрането доколу остане во дефект. Сега за тоа ќе треба да плаќаат два пати доколку остане во дефект на пат кој е од локално или општинско значење“,истакна Орцев.

За време на дебатата за Дополнетиот предлог закон за изменување и дополнување на Законот за вработувањето и осигурување во случај на невработеност Цветанка Иванова од СДСМ рече дека пратеничката група на СДСМ ќе ја поддржи ваквата измена бидејќи се воведува законска можност за субвенционирано вработување на лицата корисници на социјална помош но потенцираше дека со ваквата измена се спроведува уште едно дискрециско право на министерот за труд и социјална политика.

Таа истакна дека со вака предвидените измени корисниците на социјална помош се ставаат во нерамноправна положба и ќе се спроведува дискриминациона политика па затоа побара висината на субвенцијата да биде иста за сите приматели на социјална помош, наместо да зависи од висината на примената социјална помош.

„Во пракса ќе се субвенционира вработување на лицата кои примаат највисока социјална помош, бидејќи Владата на работодавачот му субвенционира 80 отсто од висината на исплатената социјална помош. Воедно никој нема да вработи лице кое зема социјална помош повеќе од три години, бидејќи субвенцијата ќе биде само 50 отсто“, рече Иванова.

Бети Кузмановска од ВМРО-ДПМНЕ посочи дека вака донесениот предлог е поддржан и од репрезентативните синдикати. Според неа Законот ќе биде во интерес на работниците, работодавачите и на државата, а од него најголема корист ќе имаат оние на кој најмногу им треба работата.

Собранието претпладнево го разгледа и Дополнетиот предлог на закон за електронски комуникации, во второ читање, а за него ќе треба да се гласа по редовната пладневна пауза./крај/мф/ап