Претседателскиот кандидат од редовите на СДСМ, Стево Пендаровски, одржа митинг во Струмица и на присутните им вети програма во која ќе бидат опфатени сите граѓани подеднакво и дека ќе се бори против социјалната раслоеност во државата во која живеат граѓани кои немаат еднакви права.

„Оваа политичка гарнитура која ја води државата направи две категории на луѓе. Едната се нивните, а другата категорија сме сите ние останати. Направија во оваа земја да не може да се вработи никој без партиска книшка. Во последните 5 години се иселуваат многу повеќе млади луѓе, за разлика од годините кога имавме војна кога беше најтешко. Но и во тоа време народот имаше повеќе верба дека ќе ја биде работата за разлика од денес. Сега кога не сме загрозени, луѓето бегаат од државата. Сето тоа е поради нивната политика раздели па владеј”, истакна Пендаровски.

Според Пендаровски, Македонија креира катастрофални односи со соседите, а изминативе пет години како што истакна државата немала претседател кој ќе биде коректор на политиките на извршната власт. Пред Струмичани вети департизирање на институциите.

Претседателскиот кандидат на СДСМ рече дека има решение за сите проблеми и нагласи дека клучните датуми се 13 и 27 април.

„Нема да имаме подобра шанса. Што ни е потребно? Нови лица, нови политики, досегашните се стари транзициски политичари кои десеттина години се на власт. Видовме колку можат да направат, време е да им кажеме благодариме и да донесеме нови луѓе„, рече Пендаровски./крај/мф/ап