Македонија
Бесплатни прегледи за Светскиот ден на здравјето

Бесплатни превентивни прегледи организира Министерството за здравство во сите градови низ Македонија по повод 7 Април – Светскиот ден на здравјето кој оваа година се одбележува под мотото „Болести кои се пренесуваат преку вектори или вектор преносливи болести“ со напомена „Мал убод, голема закана“.
Македонија ќе го одбележи овој ден со повеќе настани.
Министерството за здравство организира бесплатни превентивни прегледи во сите градови во државата. За таа цел, сите 33 здравствени домови на плоштадите и во парковите во градовите ќе постават пунктови за бесплатни прегледи на кои лекарски екипи на граѓаните ќе им мерат шеќер во крв, холестерол, висина, тежина. Лекари ќе даваат совети за здрав начин на живот, здрава исхрана, а ќе се делат и брошури. Пункт за бесплатни превентивни прегледи во Скопје ќе биде поставен на плоштадот Македонија. Пунктовите ќе бидат отворени од 8 до 14 часот.
Македонското лекарско друштво (МЛД) во Градската општа болница „8 Септември” организира свечен собир на кој ќе се обрати претседателот на МЛД, Јован Тофоски, ќе биде прочитан реферат на тема „Болести кои се пренесуваат преку вектори”, а ќе бидат доделени и признанија на МЛД.
По повод Светскиот ден на здравјето Универзитетската клиника за детски болести ќе биде отворена „Игротека-библиотека” во организација на ЈУ Градска библиотека „Браќа Миладиновци”. Во „Игротека-библиотека” хоспитализираните деца ќе може да го поминуваат своето време во читање книги. Опремувањето на „Игротека-библиотека” е донација од хуманитарната акција „Читај книга и подари здравје” , која се одржа во октомври 2013 година, а на која јавни личности имаа улога на библиотекари и собираа парични средства кои се донираа за Детската клиника.
Книгите се донации од библиотеката, македонски детски писатели, издавачки куќи, Фондацијата за образовни и културни иницијативи „Чекор по чекор” – Македонија и Меѓународното училиште Нова. „Игротека-библиотека” ќе ја отворат директорот на Градската библиотека, Бранко Цветкоски и директорката на Детската клиника Аспазија Софијанова.
По повод Светскиот ден на здравјето, фирмата Слух1 од 10 до 15 часот ќе врши бесплатно тестирање на слухот пред платото на ТЦ Лептокарија. Целта на акцијата е да се подигне свеста на граѓаните за здравствениот проблем кој се однесува на загубата на слухот и наглувоста.крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Непречен сообраќај по влажни коловози

Сообраќајот на државните патишта се одвива непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Облачно и свежо со врнежи од дожд, повремено пообилни

Времето денеска ќе биде облачно и свежо со повремени врнежи од дожд. Наместа врнежите ќе бидат обилни и до крајот на денот ќе наврне над 30 л/м2. Кон крајот на денот на повисоките планини ќе има услови за повремен снег. Претпладне ќе дува слаб до умерен југоисточен, а попладне и во текот на ноќта кон сабота засилен северен ветер (над 60км/ч), особено вдолж Повардарието.
Минималната температура ќе биде во интервал од 6 до 12, а максималната ќе достигне од 10 до 16 степени.
Во Скопје, oблачно и свежо со врнежи од дожд, повремено пообилни. Ќе дува слаб до умерен југоисточен, а попладне засилен ветер од северен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Во сабота ќе има повремени локални врнежи од дожд. На повисоките планини во утринските часови ќе има услови за слаб снег. Дневните температури во следните денови ќе имаат тенденција на натамошен пораст.
Македонија
Мицкоски: Граѓаните чувствуваат горчина поради отстапките, ни ветуваа чуда, а ние баравме обични работи

Премиерот Христијан Мицкоски на гостување на „Euronews“ говореше за евроинтегративните процеси на државата и предизвиците со кои се соочува, но исто така и за отстапките кои се направени на тој евроинтегративен пат.
„Имате претстава дека претходно сте го промениле знамето, сте го користеле она времено име, сте го промениле уставното име, во неколку наврати сте го менувале Уставот и секогаш некој од Брисел на вас ви велел уште само ова и тоа е тоа“, рече премиерот Мицкоски во контекст на последните барања за промена на македонскиот Устав и дополни дека во иднина ќе продолжи да се бори и аргументите да ги пренесе секаде на светот.
„Да се научиме да победуваме, тоа постојано го говорам, и во Вашингтон и во Брисел и во Берлин и во Рим и во Париз, секаде во светот во поголемите европски и светски метрополи, а не само дома. Само на тој начин вие можете да ја убедите светската јавност во исправноста на вашите аргументи“, посочи Мицкоски и продолжи:
„Мојата политичка борба се темели да успеам тоа што е изгубено, барем делумно да го повратам, и граѓаните во оваа мултиетничка држава во којашто мнозинство се Македонците, но има и дел од Албанците, Србите, Власите, Бошњаците, Ромите, Турците и останати граѓани, да имаат подобар живот и во оваа не цела година дена тоа ми успева.“
Коментирајќи ги европските пораки за интеграциите на Западен Балкан премиерот Мицкоски кажа дека македонските граѓани, особено македонскиот народ чувствуваат фрустрација, но карактерот им е да веруваат во европски вредности.
„Од самиот почеток, уште од распадот на поранешната федерација, тоа беа двете стратешки цели, членство во НАТО и членство во ЕУ. Тоа е дел од карактерот на македонските граѓани и тоа не се менува преку ноќ, но да, чувствуваат малку горчина поради кнедлите коишто мораа да ги голтнат и се исфрустрирани затоа што многумина продефилирале тука во Скопје ветувајќи ни чуда, но за жал ние баравме само обични работи, но и тие обични работи не успеаја да ни ги испорачаат. Знам дека најголемиот дел од земјите членки сакаат да го видат Западен Балкан во ЕУ. Верувам во намерите на Берлин, Париз, Рим, Будимпешта, Брисел и би рекол на 26 земји членки на ЕУ, но знам на кого не можам да му верувам. И за жал сè додека важи правилото на едногласие во ЕУ, за нас претставува ризик каква било дополнителна отстапка којашто во периодот понатака би ја правеле“, заклучи премиерот Мицкоски.