По втор пат ја преземам функцијата претседател на Република Македонија, но со тоа и должноста да бидам еден за сите, да дадам се од себе за државните интереси, за интересите на сите граѓани“, истакна претседателот на Република Македонија, Ѓорге Иванов, за време на свечената изјава што во понеделникот ја даде во Собранието на Република Македонија, а со тоа го започна својот втор мандат како шеф на државата.

„Граѓаните одлучија на кого ќе му дадат доверба да биде претседател, а кој ќе составува Влада. Оние што го бојкотираат Собранието за кое добија мандати, всушност ги бојкотираат волјата и довербата на граѓаните, кои гласале и за нив”, истакна Иванов.

Во своето обраќање тој нагласи дека со добивање на довербата на граѓаните и мандат во собранието, народните избраници со себе понесуваат и одговорност со која се бара посветена рабора, сериозност и промисленост.

„Како претседател, загрижен сум за некои реакции и постапки на дел од политичките партии, бидејќи сум и нивен претседател. Оние што мислат дека ја бојкотираат институцијата „претседател на Република Македонија”, всушност ги бојкотираат граѓаните кои гласале на претседателските избори. Оние што го бојкотираат Собранието за кое добија мандати, всушност ги бојкотираат волјата и довербата на граѓаните, кои гласале и за нив”, истакна Иванов.

Старо – ноиот претседател ја повика опозицијата да се придржува до демократските принципи и вредности почитувајќи ги правилата на игра, Уставот и законите, како и слободно изразената волја на граѓаните дадена на изборите.

Тој истакна дека ќе направи се што е во рамките на неговите надлежности да ги унапреди дијалогот и соработката внатре во институциите на државата.

„Бојкотот на институциите значи бојкот на демократијата и волјата на граѓаните, но и потценување на демократската зрелост на македонските избирачи. За првпат во историјата на Република Македонија, претседателските избори минале без ниту еден приговор до ДИК”, нагласи Иванов.

Демократската унија за интеграција со своите 19 пратеници не учествуваше на инаугурацијата на Иванов бидејќи како што претходно соопшти партијата, тој нема легитимитет бидејќи за него не гласале и мнозинството Албанци.

Со ова од ДУИ испратија јасна порака дека тие и понатаму ќе продолжат со својот став и идеја за консензуален претседател, истакнувајќи дека иако не го признаваат легитимитетот, тие го признаваат легалитетот што значи дека нема да имаат проблеми во соработката со институцијата Претседател, туку имаат проблем со начинот на кој тоа е избран.

На инаугурацијата во Собранието не присуствуваа ниту 34 – те народни избраници од редовите на СДСМ, а ваква најава стигна и од партијата на Руфи Османи која на изборите доби едно пратеничко место.

Од останатите политички партии на седницата присуствуваа ДПА и ГРОМ.

ВМРО – ДПМНЕ и ДУИ неколку дена пред одржувањето на конститутивната седница на Парламентот информираа дека ќе формираат ново парламентарно мнозинство, а преговарачките тимови на двете партии ќе продолжат на усогласување на принципите./крај/мф/ап