Македонија
650 санкции за брзо возење

Во текот на вчерашниот ден Министерството за внатрешни работи спроведе засилена акциска контрола на територијата на Република Северна Македонија за санкционирање возила што се движат со брзина поголема од дозволената, при што санкционирани се 650 возачи, извести МВР.
„Од нив, 52 возила се движеле со брзина над 50 километри на час повеќе од дозволеното, а седум се движеле со дури над 70 километри на час повеќе од дозволената брзина“, велат од МВР и притоа додаваат дека 322 возила ја пречекориле брзината во населено место, а 328 надвор од населено место.
Сообраќајните контроли продолжуваат и во наредните денови. Апелираме до сите учесници во сообраќајот да ги почитуваат сообраќајните правила и прописи и заеднички да придонесеме за побезбедни патишта, се наведува во соопштението на Министерството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Побаран доживотен затвор за убијците на Вања и Панче: Двете дела се убиства на свиреп начин за кои е предвидена најтешка казна

Обвинителките Ана Стојковиќ-Димитровска и Жаклина Крстевска во завршните зборови на денешното судење за убиствата на 14-годишната Вања Ѓорчевска и 74-годишниот Панче Жежовски, побараа доживотен затвор за Љупчо Палевски- Палчо, Велибор Манев, Боре Видевски и Влатко Кешишев.
„Делата се сторени со умисла, со намера. Жртвите се грабнати на ист начин, загрозени, врзани, во страв. Двете дела се убиства на свиреп начин, за кои е предвидена најтешка казна. Жртвите се врзани, ставени во гепек, им се вперил пиштол. Овие стресови се катастрофална траума од висок интензитет, двете жртви претрпеле тешко страдање“, рече обвинителката Стојковиќ-Димитровска.
Самиот факт дека Вања Ѓочеввска е дете од 14 години, обвинителката рече дека е доволно за доживотен затвор. За прашањата на јавноста зошто е убиена Вања, обвинителката рече дека не е нужно да се утврди мотивот за да се докаже нечија вина и дека отсуството на мотивот, кој е субјективен однос на злосторникот кон делот, не е причина некој да биде осуден.
Обвинителката кажа дека убијците имале умисла да земат пари, а примарната цел била Вања, сржта биле парите, како што се изрази, додека Панче бил средство за остварување на целта. Им требал неговиот „цитроен“ со голем гепек. Грабнувањата и убиствата биле темелно испланирани, а потоа сите траги биле уништени и избришани вклучително и пиштолот.
Обвинителството смета дека нема олеснителни околности за обвинетите оти сите четворица се во зрела возраст, сите се родители, а некои сакале да бидат и политички фактор, одзеле живот на дете- нешто што не се толерира и затоа побара доживотен затвор за сите.
Соодветна затворска казна од судот обвинителките побараа и за таткото на Вања, Александар Ѓорчевски за кого кажаа дека не тврдат дека имал умисла да му биде убиено детето, но помагал во грабнувањето и неговата улога е трагична па побараа судот да го прогласи за виновен.
14-годишната Вања Ѓорчевска беше пријавена за исчезната на 27 ноември 2023 година, а
Велешанецот Панже Жежовски беше пријавен за исчезнат на 24 ноември 2023 година, а три дена подоцна на 27 ноември беше пријавен за исчезната Вања Ѓорчевска. Двајцата беа пронајдени мртви на 3 декември 2024 година, Жежовски во близина на Велес, Ѓорчевска во Скопје.
Македонија
(Видео) Обвинителството да отвори постапка за криминалниот круг Филипче – Заев – Зобек мининг, бара Петрушевски

Фрапирани сме од молкот во СДС и кај Венко Филипче, за неговата фирма во Бугарија, џипот купен од фирма која на тендер носела јаглен во ЕСМ и фирмите на Заеви кои инкасирале 9 милиони од истиот тендер, а се поврзано со улицата Гоце Делчев бр. 12 во Петрич, вели Бране Петрушевски, пратеник на ВМРО-ДПМНЕ.
„Венко Филипче сега кога е претседател на СДС е сè уште и управител на бугарска фирма.
Истата таа бугарска фирма на Филипче дели канцеларија со фирмата на Заев која наплатила 9 милиони евра за ископ на јаглен во Грција од фирмата која го продавала на ЕСМ.
Фирмата која го продавала јагленот на ЕСМ е фирмата која му го купи луксузниот џип ауди Q8 на Венко Филипче. Овој криминален круг, Заев, Филипче, Зобек мининг мора да биде растурен“, нагласува Петрушевски.
Очекува, како што рече, ЈО да отвори постапка.
„Премногу очигледни и на тацна се сите давања и земања, и многу лесно се гледа политичкото влијание. А наградата, џипот за Филипче е крунски доказ, од каде почнува се.
ЈО да не молчи. Постапка веднаш. Во спротивно ќе се испостави дека се само заштитници на криминалците од СДС“, нагласува пратеникот на ВМРО-ДПМНЕ.
Македонија
(Видео) Бејта: Муцунски и ВМРО ДПМНЕ неуставно ја узурпираат и ја партизираат дипломатијата

Владата на ВМРО ДПМНЕ срамно, противуставно ја узурпира дипломатијата и ја претвора во продолжена рака на партијата, истакна на прес-конференција Фатон Бејта од комисијата за надворешни работи на СДСМ.
Според него, користејќи го парламентарно мнозинство, ВМРО-ДПМНЕ и министерот за надворешни работи Муцунски, прават директно мешање на законодавната во извршната власт, преку политички злоупотреби на Автентичното толкување на член 39 став 3 од Законот за надворешни работи.
Со ова толкување, како што наведе, се воспоставува обврска кандидатите за амбасадори задолжително пред надлежното работно тело во Собранието да ги презентираат своите согледувања за односите со државата на приемот или меѓународната организација.
„Без оваа процедура, не може да биде потпишан Указот за поставување на амбасадор од страна на претседателот на државата. Со тоа директно се ограничува уставната надлежност на претседателот на државата, имајќи предвид дека според член 84 алинеја 2 од Уставот, претседателот поставува и отповикува амбасадори со указ, без дополнителни услови или одобрувања.
Целта на ВМРО-ДПМНЕ е јасна – создаваат и измислуваат нов филтер, кој всушност е партиска проценка во Собранието за секој иден амбасадор. ВМРО ДПМНЕ сака да ја контролира и дипломатијата“.
Амбасадорите, додава тој, ќе бидат поставени по партиска лојалност, а не според стручноста и дипломатскиот капацитет, кој го поседуваат со што може да се стави во ризик меѓународното портфолио на државата.
„Со ваквиот чин МНР и НТ Муцунски враќаат професионални дипломати со цел да ги пополнат испразнетите амбасадорски места со „партиски војници“ на ВМРО ДПМНЕ и ВЛЕН“.
Го повика Муцунски и претседателката на државата да одговорат дали во Указите за отповикување на 9 наши амбасадори е наведено автентичното толкување на членот 39 став 3.
Според него, членот 45 јасно кажува под кои услови мандатот на амбасадорот може да трае пократко од 4 години – доколку самиот тоа го побара, ако е прогласен за persona non grata од страна на државата на приемот или ако има незадоволителни резултати во работата или со своето работење им причинува штета на интересите на државата.
Јасно е, подвлекува Бејта, ВМРО ДПМНЕ ја партизира и контролира и дипломатијата.
„Затоа наместо суштински, направија козметички измени на Законот за надворешни работи, со кои на Муцунски му се овозможува да продолжи да ги унапредува партиските војници на ВМРО во МНР и НТ.
И ова не е само политичко прашање, ова е прашање за заштита на уставниот поредок, институциите и достоинството на македонската дипломатија, нешто што ВМРО ДПМНЕ го става под своја партиска капа“.
СДСМ во консултација со правни експерти, како што најави, ќе ја разгледа можноста со цел оценување на Уставноста и законитоста на Автентично толкување на членот 39 од Законот за надворешни работи.