Градоначалникот на Скопје и кандидат за втор мандат, Петре Шилегов, денеска ја промовира новоотворената втора, надолна, шумска патека со којашто Средно Водно се поврзува со центарот на градот.

„Оние што ја пробале кажуваат дека нуди незаборавно 20 минутно адреналинско искуство. Оваа патека значи функционално комплетирање на проектот „Водно Вело Парк“ со што омилената планина на скопјани станува функционална рекреативна и туристичка зона. Водно со овие две патеки и придружната инфраструктура станува регионална туристичка атракција“, изјави  Шилегов.

„Двете патеки за планински велосипедизам дојдоа на барање на велосипедистите и планинарите кои често влегуваа во конфликт на планинарските патеки. Овие патеки немаат никаков контакт со патеките на планинарите“, вели Шилегов.

Патеката е долга над 3.5 км и широка е 3 м. Косините се лесно совладливи и од помалку искусните возачи, но носењето на заштитна опрема е задолжително и е препорачливо. Шилегов информира дека за оваа патека се расчистувала единствено ниска вегетација и дека не е сечена шума.

Тој потсети дека изминатите четири години воведени се бесплатни автобуски линии, воведен е ред во паркирањето, поставени се нови детски содржини, набавена е планинска противпожарна опрема и возила, организирана е спасителна служба со црвениот крст на Град Скопје.

„Кога се воведе паркингот на Водно најавата беше дека парите ќе се инвестираат во планината. Денес може да каже дека оваа патека со вредност од 8 милиони денари е финансирана со паркинг картите на автомобилистите. Да ве потсетам, на Водно му се случија тешки злостори во нашето блиско минато. На Водно му се случи Сончев Град – населба која не се догради а за која се пресече шумата на источните падини кон општина Кисела Вода. На Водно му се случи патот до Сончев Град – којшто се изгради несоодветно и сега е небезбеден за употреба и затворен. Овој пат не само што пресече илјадници дрвја на планината, туку ги пресече и најубавите планинарски патеки од Кисела Вода кон Марково Крувче и Средно Водно. На Водно му се случи и поместувањето на градежната линија и засилената урбанизација над Центар и Карпош за коишто ја имаа помошта на ГУП-от изработен од мојот претходник Коце Трајановски“, рече Шилегов.

Изградбата на паркови, културни објекти и јавни содржини кои обединуваат луѓе, додаде тој, не смее да запре.

„Изградбата на европско, урбано и зелено Скопје мора да продолжи. Драги скопјанки и скопјани, Вие граѓаните сте силата на овој град, и само вие одлучувате во каков град ќе живеете. Иднината на Скопје е во ваши раце. Да се обединиме затоа што развојот на Скопје не смее да запре“ потенцираше Шилегов.

Министерството за внатрешни работи ги отфрла обвинувањата на лидерот на ВМРО-ДПМНЕ, Христијан Мицкоски, дека полицијата координирано следела и малтретирала членови на ВМРО-ДПМНЕ.

„Категорично ги отфрламе како невистинити сите обвинувања за наводно „координирано следење, малтретирање и селективно попречување на слободата на луѓе”. Во јавноста не е изнесен ниту еден доказ ниту дека тоа се договарало, ниту дека МВР на било кој начин е дел од таква наводна операција, ниту пак дека тоа реално се случувало“, велат од МВР.

ВМРО-ДПМНЕ денеска обвини дека полицајци блиски до Социјалдемократскиот сојуз одработувајќи за оваа партија, формирале злосторничка група за време на изборната кампања чија цел е следење на членови на ВМРО-ДПМНЕ и злоупотрeба на службените овластувања, со цел физичко, како што велат од ВМРО-ДПМНЕ, малтретирање и селективно попречување на слободата на движење на луѓе кои не се од Социјалдемократскиот сојуз.

„Групата од над четириесетина полицајци се координирала на апликацијата вибер. Во таа група именувана „ХХХ“ според она што досега го идентификувавме има началници, полициски командири и полицајци во улога на партиски извршители. За изборите било договарано, следење, малтретирање и шиканирање на луѓе од ВМРО-ДПМНЕ. Во групата членувале и командирот на ОВР Прилеп – Дарко Цуцулоски, заменикот командир – Ванеса Колашинац, началникот на НККР Прилеп – Емилија Велкоска, како и Кире Китаноски кој е личен шофер на советникот на министерот Спасовски – Оливер Лукароски, кој според конверзацијата во групата е главниот налогодавец“, изјави Драган Ковачки од ВМРО-ДПМНЕ.

Од МВР велат дека не постои таква вибер група и дека активностите на МВР и во Прилеп и во било кој друг град не се координираат преку вибер групи.

Во исто време, велат од МВР, после направена проверка на статистиката за возила испратени на технички преглед, информираме дека тој ден во Прилеп нема испратено возило на технички преглед, ниту пак, е изречена санкција за сообраќаен прекршок, што, како што велат од МВР, говори дека наведените дејствија, всушност, не се случиле.

„МВР веднаш започнува внатрешна истрага за утврдување на фактите, имајќи предвид дека вибер групи или графички прикази од вибер групи може да се креираат и изработат во секое време и од секого, и имајќи предвид дека до МВР не е пристигната ниту една пријава од граѓанин за дејствија во Прилеп на денот на изборите какви што беа презентирани на прес – конференцијата“, се наведува во соопштението.

Полицијатата под водство на Заев и Спасовски организира следење и шиканирање, имаме докази за малтретирање на граѓани во изборна кампања, изјави претседателот на ВМРО-ДПМНЕ, Христијан Мицкоски, денес од Пештани и го повика обвинителството да отвори истрага.

„Да, имаме повеќе вакви докази што се доставени до меѓународната заедница, го повикувам и обвинителството да излезе со истрага и таа истрага да кулминира со кривична пријава, бидејќи таму имаме повеќе од 40-тина полициски службеници кои што се блиски до владејачката партија до СДСМ, гледате таму каква реторика има, гледате каков е речникот на тие луѓе кои што треба да бидат пример во средините каде што функционираат, за жал тие се само од тоа што го прочитав не се пример во општината и предизвикаа една жестока турбуленција во мојот стомак и едно чувство на гадење. Повеќе од двајца, според кривичниот законик е злосторничко здружување, така што го повикувам обвинителството веднаш да постапи затоа што ќе даде лош пример, а ќе даде лош пример во насока на обесхрабрување на граѓаните бидејќи нема правда во оваа држава, ако тоа може да го прават на најголемата политичка партија во Македонија и ако тоа може да го прават на идниот градоначалник на таа општина станува збор за општина Прилеп каде што Борче Јовчевски убедливо победи, би рекол 2 спрема 1 наспроти неговиот политички противник кандидат за градоначалник, тогаш како ние граѓаните можеме да се чувствуваме безбедни, кога истите тие што треба да се грижат за нашата безбедност всушност ја загрозуваат нашата безбедност. на ова мора да му дојде крајот и затоа го повикувам обвинителството веднаш да постапи според овие индиции“, нагласи Мицкоски.