Македонија
Пет години од смртта на претседателот Трајковски

Македонија денеска одбележува пет години од загинувањето на претседателот Борис Трајковски година и осуммината соработници и членови на екипажот
Македонија денеска одбележува пет години од загинувањето на претседателот Борис Трајковски година и осуммината соработници и членови на екипажот во авионската несреќа во Босна и Херцеговина.
Државна делегација претпладне треба да положи цвеќе на гробот на претседателот Трајковски во Алеја на Великаните, на градски гробишта –Бутел во Скопје.
Македонска делегација во која се потпретседателот на Собранието Рафис Аљити, министер за надворешни работи, Антонио Милошоски, како членови на семејствата на загинатите ќе положат цвеќе на Спомен обележјето во Ротимље, Босна и Херцеговина.
Претседателот на Собранието, Трајко Вељаноски напладне по повод годишнината ќе им се обрати на пратениците. Одбележувањето ќе биде проследено и со меѓународен младински лидерски форум во Скопје.
Истрагата за трагедијата беше полна со контроверзи, а македонските и босанските власти како причина за уривање на авионот посочија на пропусти на екипажот. Министерството за внатрешни работи најави нова проверка на анализите на воздухопловните експерти за несреќата, со претпоставка дека ќе се дојде до информации врз основа на кои Обвинителството ќе отвори нови истрага.
Собранието лани формираше Анкетна комисија за утврдување на околностите на несреќата. Претходно во 2008 година, Обвинителство го одби барањето на Министерството за внатрешни работи да се отвори повторно истрага за несреќата, со образложение дека нема нови докази за повторување на истражната постапка.
Авионот со кој претседателот патуваше на Меѓународна конференција за инвестирање во Босна и Херцеговина се урна во атарот на Матиќ Брдо кај селото Хусковиќи во близина на Мостар.
Со претседателот загинаа, советниците во Кабинетот, Димка Илкова Бошковиќ, Ристо Блажевски и Анита Кришан-Лозановска, Миле Крстевски од МНР, членовите на обезбедувањето на претседателот Борис Велинов и Аце Божиновски и пилотите Марко Марковски и Бранко Ивановски./крај/ил
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се навршуваат 24 години од загинувањето на бранителите кои нагазнаа на мина кај Љуботенски бачила

На повеќе локации во Скопје денеска ќе бидат одбележани 24 години од загинувањето на осуммината бранители, припадници на резервниот состав на Армијата кои загинаа во 2001 година кај месноста Љуботенски бачила.
Делегација од Министерството за одбрана и Генералштабот на Армијата предводена од директорот на Генералштабот, бригаден генерал Орце Јордев ќе положи венци со свежо цвеќе пред спомен обележјето на паднатиот бранител Томислав Настевски во Општина Ѓорче Петров, споменикот на паднатите бранители во село Волково, споменик на загинати бранители во село Љубанци и спомен-плоча во касарната „Илинден“.
Делегација на Собранието во состав на пратеничките Емилија Ангелова и Каролина Насковска, ќе положи свежо цвеќе пред спомен-обележјето поставено во чест на загинатите бранители во село Љубанци.
Општина Ѓорче Петров организира оддавање почит пред спомен-чешмата на Томислав Настески – Бумбар, во урбана заедница Мирче Ацев (ул. „Ѓорче Петров“) додека централна комеморативна манифестација ќе биде пред споменикот на загинатите бранители во Волково.
На 10 август 2001 година со воено товарно возило на патот кон месноста Љуботенски Бачила при активирање на мина животот го загубија осум припадници на резервниот состав на Армијата: Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски. На овој ден се оддава почит и на Ацо Ангеловски кој во 2000 година загина во Арачиново при вооружен напад врз полициска патрола.
Македонија
Летните одмори направија редици на Табановце

Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, на ГП Табановце времето на чекање за влез во државата е околу еден час, на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Внимавајте на сонце, денес многу топло со температури до 39 степени

Времето денеска ќе биде сончево и многу топло. Ќе дува слаб до умерен ветер од источен и североисточен правец.
Минималната температура ќе биде во интервал од 12 до 21, а максималната ќе достигне од 32 до 39 степени.
Во Скопје, сончево и многу топло со слаб до умерен променлив ветер.
Минималната температура ќе се спушти до 19, а максималната ќе достигне до 39 степени.
Под влијание на многу топла воздушна маса од југ во текот на наредната седмица времето ќе биде претежно сончево и многу топло.
Дневната температура насекаде ќе биде над 30 степени, а наместа ќе достигне и 40 степени.