Македонците, во услови на финансиската криза што го тресе светот, најмногу планираат да штедат на телефонските сметки

Македонците, во услови на финансиската криза што го тресе светот, најмногу планираат да штедат на телефонските сметки.

Ова го покажуваат резултатите од анктетата спроведена од ГфК Скопје, претставништво на ГфК Групацијата, една од водечките меѓународни компании за истражување на пазарот.

Граѓаните од југо-западниот дел со најголем процент 34% се изјасниле дека повеќе ќе внимаваат на телефонските сметки. Во Скопје исто така е голем процентот што се однесува на намалување на трошоците за телефон (23%), а најизразен е кај домаќинствата со месечни примања од 6.000 -9.000 денари (35%).

Голем број од граѓаните планираат да штедат на облека и обувки (24%), и тоа најмногу во југоисточниот дел на Македонија, 32 отсто.

Македонците планираат рестрикции и во однос на одмор надвор од местото на живеење 22%, излегувања/забава 21% и посета на кафулиња 16%. Во Скопје е најголем процентот на оние кои ќе ги намалат трошоците за излегување и забава 27%, а 26% од нив се на возраст од 19-24 години.

Рационализација на трошоците за бензин/користење на автомобил планираат 15% од граѓаните, а исто толку се планира да се штеди и на купување опрема за домаќинство (бела техника, мебел.) 15%.

Само 13% од испитаниците се изјасниле дека ќе намалат на штедење и инвестирање, најмногу граѓаните на возраст од 45-54 години, како и оние што имаат месечни примања од 30.000-45.000 денари.

Мал е процентот на граѓаните кои ќе штедат на потребите од секојдневна исхрана 6%, што укажува на фактот дека и покрај кризата Македонија е домаќинска земја и нема намера да штеди на храна, оценува ГФК Скопје.

Сепак има и такви кои планираат да штедат и на храна, а тоа се граѓаните кои имаат месечни примања до 3.000 денари, и оние кои се на возраст од 55-64 години.

Само 5% планираат да влијаат на намалување на трошоците со картици, и тоа најмногу граѓаните кои се на возраст од 35-44 години (10%), и оние со завршено вишо и високо образование (8%).

Она на што граѓаните најмалку планираат да штедат се медицински услуги и лекови или само 3 отсто од анкетираните.

Прикажаните податоци се резултат на истражување на ГфК Скопје на репрезентативен примерок на 1.000 граѓани постари од 15 год, а анкетата е спроведена по домаќинства во февруари, оваа година./крај/амп