Одзивот на гласачите за претседателските избори до 13 часот е 27,82 проценти, а помали нерегуларности се забележани на избирачки места во Прилеп,

Одзивот на гласачите за претседателските избори до 13 часот е 27,82 проценти, а помали нерегуларности се забележани на избирачки места во Прилеп, Струга, Куманово, Липково и делови од Скопје.

Ова на попладневната прес конференција го соопштија претставници на Граѓанската асоцијација, МОСТ, од каде информираат и дека на изборите за градоначалник и советници на град Скопје, излезноста до 13 часот е 25,93 проценти.

Набљудувачите на МОСТ забележале нарушување на изборниот процес на гласачко место во Прилеп, каде на гласачите јавно им се чита името и презимето од страна на членовите на избирачкиот одбор и истите се заведуваат од страна на овластените набљудувачи на подносителите на листи.

Во Лабуниште, општина Струга е забележано агитирање на две избирачки места, а на друго избирачко место во истата општина, гласањето се одвива без никаква идентификација на гласачите.

Нерегуларности има и на избирачко место во општина Аеродром, каде се делат листови со инструкции како и за кого да гласаат избирачите. Сличен притисок има и на три избирачки места во општина Илинден.

Гласањето е прекинато на едно избирачко место во општина Липково, поради несоодветен гласачки материјал кој го поседувал избирачкиот одбор.

МОСТ известува и дека на избирачко место во општина Чаир, во материјалот за гласање недостасуваат 300 ливчиња, но и покрај тоа Изборниот одбор добил инструкции да го продолжи гласањето.

Набљудувачите на МОСТ информираат и дека гласањето за локалните и претседателските избори воопшто не е започнато на 92 гласачки места. /крај/со/мс