Двократниот македонски фудбалски првак, Победа, е казнет за лажирање од УЕФА со забрана да настапува во сите европски натпреварувања во следните осум

Двократниот македонски фудбалски првак, Победа, е казнет за лажирање од УЕФА со забрана да настапува во сите европски натпреварувања во следните осум години.

Одлуката, како што пренесува Макфакс,вечерва ја соопшти Европската фудбалска федерација (УЕФА) по истрагата што ја водеше за мечот на Победа против ерменски Пјуник во рамки на првото квалификациско коло во Лигата на шампиони,на 13 јули 2004 година.

Дисциплинската комисија на УЕФА ги казни и претседателот на прилепска Победа Александар Забрчанец како и поранешниот капитен на клубот Николче Здравески, со доживотна забрана да извршуваат каква и да е активност во фудбалот.

Со истрагата, како што е соопштено, е утврдено дека сите суспендирани ги прекршиле принципите на интегритет и спортско однесување со манипулирање на конечен исход на меч во рамките на УЕФА со цел да стекнат предност за себе и трета страна.

Обвинението против Победа, нејзиниот прв човек, и еден фудбалер, се темели на извештаи прибрани од обложувалниците за вештачко кревање на коефициентот за односниот натпревар и изјави на неколку очевидци.

Одлуката е донесена по седумчасовно заседавање на Дисциплинската комисија на УЕФА, за време на кое биле сослушани претставници на Победа, како и експерт за обложување.

УЕФА соопшти дека ќе побара примена на овие суспензии и од страна на Светската фудбалска федерација (ФИФА).

За УЕФА беше сомнителен првиот меч меѓу Победа и Пјуник, одигран во Скопје во кој гостите славеа со 3:1 со головите на Манучарјан во 15 и 41 минута и Ховханисјан во 26 минута, почесниот погодок за прилепчани беше дело на Гешоски во 80 минута. Реваншот во Ереван заврши без победник – 1:1 и во следната рунда се пласира ерменскиот шампион. /крај/ег/