Комесарот за проширување Оли Рен и потпретседателот на ЕК Жак Баро влегоа во клинч за тоа дали безвизен режим да биде препорачан во пакет за Балканот

Комесарот за проширување Оли Рен и потпретседателот на ЕК Жак Баро влегоа во клинч за тоа дали безвизен режим да биде препорачан во пакет за Балканот, или само за Македонија, пренесува Макфакс.

Несогласувањето помеѓу комесарот за проширување Оли Рен и потпретседателот на Европската комисија (ЕК) задолжен за правда и внатрешни работи, Жак Баро, е околу одредувањето временски рок за ставање на Србија на позитивната Шенген листа.

Според анонимни дипломатски извори во Брисел, Рен по секоја цена сака да се покрене процедура за визна либерализација со Србија, пред годишните одмори во европските институции, додека Баро врз основа на досега исполнетите услови на земјите од Западен Балкан, е расположен да напише предлог само за Македонија.

Комесарот Рен е свесен какви политички последици би можело да има за целиот регион и неговата стабилност, а особено за Србија, и поради тоа се одлучил да тргне во јавен притисок врз Баро, но и поедини држави членки во ЕУ, кои се резервирани околу брзата визна либерализација.

„Тоа што комесарот Рен постојано го споменува зборот препорака, а не предлог, е многу важно. Во ексклузивна надлежност на ЕК е предлагањето промени на регулативите, директивите и другите акти на ЕУ“, наведуваат извори во Брисел.

Како што се прецизира, иницијативата за ставање на една земја на позитивната шенген листа, се покренува со „предлог на ЕК, а не со препорака“.

Рен може како надлежен комесар за земјите кандидати и потенцијални кандидати, да препорача укинување на визите за нив, но не и да поднесе извештај во т.н. колеџ на ЕК (седница на која учествуваат сите комесари, а со неа раководи претседател на ЕК).

Тоа е ингеренција на комесарот за правосудство и внатрешни работи, односно потпретседателот Баро и неговата Дирекција за правосудство и внатрешни работи, која драфтира текстот на предлогот.

Намерата на Рен е да го примора својот колега Баро, да ги отвори картите, односно да се определи дали ке помогне да се турка пакетот Македонија – Србија – Црна Гора, или ќе прибегне кон итрина да ја блокира Србија, а да ја пропушти Македонија, за која знае дека процедурата ќе трае многу подолго, отколку што тоа би било случај со Србија.

Европската комисија в понеделник треба да го објави извештајот во врска со препораките за укинување на визите./крајд/мс/ег//