Македонија во голем дел има остварено значаен напредок во подобрување на деловната клима,но потребно е спроведувањето на одредени реформи да продолжи

Македонија во голем дел има остварено значаен напредок во подобрување на деловната клима, но потребно е спроведувањето на одредени реформи да продолжи.

Ова се наведува во извештајот за оценката на деловна клима во Македонија што денеска во Скопје беше презентиран од страна на Проектот за деловно опкружување на УСАИД (Биз Клир).

Како најзначајни недостатоци врз кои особено треба да се посвети внимание, беа посочени отсуството на дијалогот, големата невработеност, како и недоволно ефикасната правна рамка.

„Во престојниот период ќе треба да се продолжат напорите за подобрување во сферата на дијалогот помеѓу јавниот и приватниот сектор, јакнењето на капацитетите на институциите за спроведување на законите, како и изнаоѓање на решенија за ефикасно решавање на стопанските спорови, изјави Марк Волтер.

Исто така, додаде Волтер, реформата на пазарот на работна сила треба да продолжи со примена на флексибилен пристап воден од потребите на пазарот.

Според ранг листата на „Доинг бизнис“, Македонија се наоѓа на 71 место, од 181 држави во светот, што е напредок од осум места во споредба со лани.

Македонија најдобро се котира во категоријата „Започнување бизнис“, каде што е пласирана на високото 12 место во светот. Наспроти ова, Македонија најлошо е рангирана во категориите „Вработување“ (125 место), односно „Затворање на бизнис“ (129).

Целта на оценките на Биз Клир е на владите, донаторите и останатите заинтересирани страни да им се обезбедат сите потребни информации за нивото и ефикасноста на законите и институциите во одредена земја. /крај//ап/