Најпогодени со екстремните климатски промени во Источна Европа и Централна Азија ќе бидат Русија, Албанија, Турција и Ерменија, а веднаш зад нив се

Најпогодени со екстремните климатски промени во Источна Европа и Централна Азија ќе бидат Русија, Албанија, Турција и Ерменија, а веднаш зад нив се Македонија и Таџикистан.

Ова се наведува во извештајот на Светската банка за прилагодување на климатските промени, презентиран синоќа во Бон, во кој се оценува дека регионот на Централна и Источна Европа, како и на Централна Азија ќе биде погоден со климатските промени многу повеќе отколку што се очекуваше.

Регионот веќе ги чувствува климатските промени преку пораст на температурите, хидролошките промени, поизразените суши, поплавите, топлотните бранови, како и зимските бури и шумските пожари.

Просечната температура во регионот од почетокот на 20-тиот век пораснала за 0,5 степени во јужниот дел, до 1,6 степени во северниот дел.

Во Извештајот се очекува зголемување на просечните температури за 1,6 до 2,6 степени Целзиусови до половината на овој век.

Се очекува во северниот дел на регионот бројот на зимските денови со температура под нулата да биде намален за 14 на 30, во текот на наредните 20 до 40 години, додека јужните делови, вклучувајќи ја и Македонија би можеле да доживеат најголеми промени во текот на летните сезони со зголемување на бројот на деновите со температура над 30 степени целзиусови од 22 на 37.

Промените во нивото на морињата, како уште една последица од климатските промени, според извештајот, најизразени ќе бидат во Балтичкото море, Источниот дел на Јадранското море и Медитеранскиот брег на Турција, Црното море, како и во Каспиското море и во Рускиот дел на Северниот леден океан.

Претставничката на Светската банка Мериен Феј, која е и авторка на Извештајот смета дека влијанието на климатските промени во земјите од источна Европа и централна Азија ќе биде поголемо поради лошата инфраструктура и малите вложувања во заштита на животната средина.

Регионот може да ја зголеми отпорноста на климатските промени со зголемување на инвестициите во инфраструктурата и заштитата на животната средина, кои пак имаат позитивно влијание на одржливиот развој, оцени Феј.

Извештајот беше претставен на разговорите за климатските промени во Бон на Рамковната конвенција на Обединетите нации за промените во климата (УНФЦЦЦ)./крај/сб/мп