Учебната 2008/2009 година завршува денеска за околу 300 илјади основци и средношколци во Македонија

Учебната 2008/2009 година завршува денеска за околу 300 илјади основци и средношколци во Македонија.

Изминатата година ќе остане запаметена по големиот број новини кои беа воведени во образовниот процес во државата, од кои некои не поминаа со успех.

Во учебната 2008/2009 година за прв пат беа воведени двата изборни предмети веронаука и историја на религии за петтоодделенците. Поголемиот дел од родителите на учениците се одлучија нивните деца да изучуваат веронаука, а учебниците по тој предмет доцнеа неколку месеци.

Но, верското образование кон средината на месец април годинава падна на Уставен суд, откако беше донесена одлуката за укинување на членот 26 од Законот за основно и средно образование. Уставниот суд излезе со образложение дека одредбата од Законот е спротивна на Уставот.

Вероучителите, кои беа вработени оваа година во училиштата одржаа протести во Скопје против таквата одлука, а јавноста остана поделена по тоа прашање.

Наставниците кои членуваат во Синдикатот за образование, наука и култура (СОНК) во ноември, минатата година штрајкуваа десеттина работни денови со барање да им се зголемат примањата и трајно да се вработат просветните работници кои работат со договор на дело.

Министерот за образование, Перо Стојаноски пред неколку дена соопшти дека до крајот на јуни ќе бидат вработени наставници кои работат со такви договори, а предност ќе имаат оние кои без прекин работат пет години.

Изминатата учебна година, за прв пат во основните и средните училишта требаше да биде воведено и екстерното тестирање. Тоа, според Министерството за образование и наука имаше за цел да ја провери објективноста на наставниците при оценувањето. Учениците неколку дена протестираа против таквата новина, но единствено матурантите се изборија за ослободување од екстерното тестирање поради тоа што на крајот од годината полагаат и државна матура.

Сепак, Уставниот суд и таквата новина ја стави под знак прашалник, кога кон крајот на месец мај поведе постапка за одредби од законите за основно и средно образование, што се донесени во јули 2008 година, а кои се однесуваат на екстерна проверка на знаењето на учениците.

Судот изрече привремена мерка за запирање на извршувањето на актите и дејствијата што се базираат на законските одредби./крај/амп