Одлуката на советот на министри за надворешни работи има две димензии – препознавање на постигнувањата од технички план и политичката волја во ЕУ

Одлуката на советот на министри за надворешни работи има две димензии – препознавање на постигнувањата од технички план и исполнувањето на критериумите за безвизен режим и втората е самата политичка волја на сите земји членки на ЕУ и сите земји членки согласно оваа визна политика.

Ова денеска во Скопје го изјави министерот за надворешни работи Антонио Милошоски по повод вчерашната одлука на Советот на министри за надворешни работи на ЕУ за зелено светло за визна либерализација на Македонија.

“Визната либерализација е процес кој очекуваме да заврши позитивно до крајот на оваа година“ рече Милошоски.

Тој објасни дека по донесувањето на оваа одлука на ред е Европската комисија да ја покрене и процедурално иницијативата за измена на регулативата за визна либерализација.

Европскиот парламент треба да даде согласност за новата регулатива и тоа од комисиите – за правда и внатрешни работи, и за надворешна политика, со што би се создале сите услови на први декември 2009 година повторно Советот на министри да може да го затвори донесувањето на одлуката.

Потоа истата ќе биде објавена во службените гласила на ЕУ и со самото тоа станува применлива за сите земјо членки на Еврозоната.

„Тоа значи дека македонските граѓани со македонски пасош ќе можатда се движат од крајот на оваа или од почетокот на наредната година слободно во шенген зоната“.

Според Милошоски ова од први јануари ќе важи и за Швајцарија и Норвешка.

Министерката за внатрешни работи Гордана Јанкулоска посочи дека визната либерализација се однесува на сите важечки македонски патни исправи без оглед дали станува збор за биометриски или стариот тип на пасоши. /крај/амп/