Спорот со името треба да се реши со компромис, рамноправност и запазување на достоинството и принципите на Скопје и Атина

Спорот со името треба да се реши со компромис, рамноправност и запазување на достоинството и принципите на Скопје и Атина.

Ова попладнево го изјави шефот на дипломатијата Антонио Милошоски по координативната средба на државниот врв за текот на разговорите за надминување на разликите за името со Грција.

„Сметам дека за долгорочно и успешно затворање на овој спор навистина е потребно да има една средина, еден компромис, во кој ќе се чувствува одредена рамноправност и запазување на достоинството и принципите на двата субјекти вклучени во ова прашање“, изјави Милошоски.

Македонскиот државен врв е подготвен во претстојната нова рунда најавена од медијаторот Метју Нимиц да вложи максимални напори за исчекор во дијалогот со Грција околу името, изјави Милошоски по средбата што ја свика претседателот Ѓорге Иванов, а на која учествуваа и премиерот Никола Груевски и вицепремиерот Абдулаќим Адеми.

Одговарајќи на новинарски прашања по средбата, Милошоски не прецизираше дали може да се очекува нов предлог од Нимиц.

„Амбасадорот Нимиц е човек кој има долгогодишно искуство, кој е посветен на ова прашање и очекуваме да знае да најде начин и да направи една добра проценка како и кога можеме да направиме одредени придвижувања“, изјави Милошоски.

Тој најави дека на координациите околу името во иднина и понатаму ќе биде вклучуван вицепремиерот Адеми, како претставник на коалициониот партнер во Владата, но исто така и како легитимен претставник на македонските Албанци.

„Ова е само формализирање на една идеја и размислување кое што подолго време е дел од владиниот пристап кон ова прашање и денес се реализира и сметам дека е добар потег. Учеството на ДУИ во Владата, истовремено и односот на македонските Албанци кон прашањето кое го има наметнато Република Грција, а поврзано со нашето уставно име, има големо значење за нас и сметам дека Република Македонија со ова може да демонстрира внатрешно политички една солидарност меѓусебна, а надворешно политички едно единство кое е навистина многу потребно да се направат добри и квалитетни исчекори по овој спор “, наведе Милошоски.

Тој изрази жалење што во Собранието изостана консензус по предлог државната стратегија за името, поднесена од пратеникот Стојан Андов.. „Останува на Собранието да проценат кога и како можат да ја донесат оваа стратегија и основните насоки. Во секој случај важно е доколку истата биде донесена, да има широк консензус за тоа прашање.“, изјави шефот на дипломатија Антонио Милошоски по координацијата на државниот врв. /крај/ег/