Грчката пошта ја саботирала кампањата на „Виножито“ за евроизборите одржани на почетокот на јуни, соопшти денеска партијата на македонското малцинств

Грчката пошта ја саботирала кампањата на „Виножито“ за евроизборите одржани на почетокот на јуни, соопшти денеска партијата на македонското малцинство во Грција.

Станува збор за пропаганден материјал, што „Виножито“ го испратил преку пошта до своите гласачи во северна Грција, како алтернатива да ги промовира своите ставови во услови на целосна блокада од страна на грчките медиуми, јавува Макфакс.

Материјалот бил испраќан преку грчката пошта која е во државна сопственост и вклучувал пропаганден изборен материјал и ДВД-а.

Партијата во вторникот била известена од поштата во Лерин дека има пакет, кој треба да се подигне на име на „Виножито“.

Нашите претставници отидоа во поштата и беа шокирани кога видоа дека пакетот е вреќа полна со писма со пропагандниот материјал, кои не биле испратени на доставените адреси , соопшти „Виножито“.

Писмата биле адресирани до цели села во северниот дел на Грција и биле вратени во поштата во Лерин.

„Виножито“ најостро го осуди мешањето на грчката пошта во изборната кампања.

„Ова е уште еден доказ на саботажата од грчките државни органи против партијата на етичкото македонско малцинство во Грција“, соопшти „Виножито“.

Партијата ќе вложи официјална жалба до грчката пошта со барање за објаснување зошто не биле испратени писмата, а разгледува и правна постапка во врска со овој потенцијално криминален чин./крај/с/ил/ег/