По обвинувањата дека на избирачко место во Бутел било фотографирано гласачко ливче, портпаролот на Државната изборна комисија Адмир Шабани вели дека инцидент немало. Недоразбирањето било надминато, а процесот на гласање не бил спречен во ниту еден момент.

„ Во Бутел се работело за едно недоразбирање кое е надминато. Немало ниту прекин ниту било каков друг инцидент во конкретното избирачко место“, рече портпаролот Шабани.

Дел од медиумите јавија дека гласањето во Бутел било прекинато откако гласач го фотографирал избирачкото ливче.

На избирачкото место во селото Лојане, општина Липково, имало кус прекин на гласањето поради неусогласени сериски броеви на гласачките ливчиња, потврди Адмир Шабани, портпарол на Државната изборна комисија. Прекинот траел кусо време додека биле пребројани гласачките ливчиња кога било утврдено дека вкупниот број се согласува.

„Добивме информација за кус прекин на гласањето во Лојане, но причината била несогласување на сериските броеви на гласачките ливчиња. Прекинот траел додека изборачкиот одбор не ги пребројал ливчињата. Утврдиле дека има толку ливчиња колку што избирачкиот одбор пребројал. За целата ситуација, има посебен записник. Гласањето продолжило и тече без прекини“, објасни портпаролот Шабани.

До ДИК до 15 часот официјално нема стигнато приговор за изборниот процес.

До 15 часот на гласање излегле 576.576 гласачи, односно одѕивот е 31 отсто, соопшти Адмир Шабани, портпарол на Државната изборна комисија. Податоците се од 3.435 избирачки места од вкупно 3.490.
Најголем одѕив до 13 часот ДИК регистрира во Вевчани, каде што до 15 часот на гласање излегле 49,22 отсто од запишаните гласачи.

Во ИЕ 1 одѕивот до 15 часот е 34,51 отсто, во ИЕ 2 е 29,96 отсто, во ИЕ 3 е 37,24 отсто, во ИЕ 4 одѕивот до 15 часот е 35,56 отсто, во ИЕ 5 гласале 31,51 отсто од гласачите и најмал е одѕивот во ИЕ 6, каде што на гласање излегле 22,85 отсто.

Портпаролот Шабани ги издвои општините со повисок одѕив.

„Во ИЕ 1 поголем одѕив е забележан во Карпош – 38,4 отсто и во Центар – 38,82 отсто. Во ИЕ 2 општини што се издвојуваат се Ѓорче Петров со 36,74 отсто и Бутел со 34,54 отсто. Во ИЕ 3, каде што вкупниот одѕив е 37,3, се издвојуваат Берово со 41,09 отсто, Градско со 37,62 отсто, Лозово со 42,46 отсто и Пробиштип со 44,32 отсто. Во ИЕ 4 се издвојуваат Гевгелија со 44,01 отсто, Неготино со 41,5 отсто и Демир Капија со 42,52 отсто. Во ИЕ 5 со вкупен одѕив од 31,76 отсто се идвојуваат Вевчани со 49,22 отсто, Крушево со 47,02 и Дебарца со 36, 07 отсто. Во ИЕ 6 ја издвојувам општината Гостивар со 23,65 отсто, Тетово со 26,17 отсто и Јегуновце со 25,21 отсто“, рече портпаролот Шабани.

Официјални приговори не се пристигнати до ДИК, а се случиле ситни технички проблеми за кои портпаролот Шабани вели дека веднаш биле решени.