Нов сомнителен случај на заразен од грипот А (Х1Н1) е регистриран денеска во Македонија, соопштија официјални извори

Нов сомнителен случај на заразен од грипот А (Х1Н1) е регистриран денеска во Македонија, соопштија официјални извори.

Станува збор за машко лице од Битола, кое деновиве пристигнало од Германија, јавува Макфакс.

Министерот за здравство Бујар Османи соопшти претпладнево на прес конференција дека туку што добил информации за случајот и засега нема повеќе детали. Не е познат идентитетот на пациентот и неговата возраст.

Се претпоставува дека тој итно ќе биде пренесен од Битола на инфективната клиника во Скопје, каде веќе се хоспитализирани други две лица со симптоми на новиот грип

Во врска со пациентот, кој во понеделникот беше префрлен од Прилеп на клиниката во Скопје, со симптоми на грипот, резултатите потврдиле дека станува збор за типот А, но поттипот не е одреден. Тоа дополнително ќе се направи во референтната лабораторија во Лондон.

За првиот сомнителен случај, што беше регистриран кај дете на возраст од 4 години, кое пристигнало во Прилеп од Австралија, надлежните очекуваат во среда вечер да ги добијат резултати од лабораторијата во Лондон, кога ќе биде јасно дали тој е заразен од свинскиот грип.

Министерот Османи апелираше денеска да не се создава паника меѓу населението бидејќи „оваа појава, со оглед на летната сезона на патување, како и претходно прогласената пандемија, беше сосема очекувана“.

Османи предупреди лекот тамифлу да не се зема превентивно и на своја рака бидејќи на тој начин се создава отпорност на болеста./крај/мс/ег/