Македонија
Без визи во ЕУ со новите македонски пасоши

Европската комисија денеска предложи на граѓаните на Македонија да им се обезбеди патување во шенгенскиот простор без визи, со биометриски пасоши
Европската комисија денеска во Брисел предложи на граѓаните на Македонија, Србија и на Црна Гора да им се обезбеди патување во шенгенскиот простор без визи, со биометриски пасоши.
„Денеска можеме да му предложиме на Советот на Европската унија укинување на визите за Македонија, Србија и Црна Гора“, рече еврокомесарот за правда Жак Баро
Тој додаде дека Советот за одлуката, која треба да стапи во сила на 1 јануари 2010 година, најверојатно ќе се произнесе кон крајот на октомври по консултациите со Европскиот парламент.
Македонија ги исполни условите за укинување на визите многу добро, рече Баро, додавајќи дека препораката е донесена врз основа на оценката за секоја земја посебно во воведувањето биометриски пасоши, управување со границите, миграциона политика, борбата против корупцијата и организираниот криминал и почитувањето на човековите права.
Ова е многу значаен ден за луѓето од Западен Балкан, за Европа и за мене, рече еврокомесарот за проширување Оли Рен
Граѓаните на Македонија, Србија и на Црна Гора ќе можат да патуваат без визи во сите земји членки на Европската унија, освен Велика Британија и Ирска, како и во Норвешка, Швајцарија и Исланд, рече Рен, додавајќи дека нема повеќе трошоци за визи, документи, писма со покани за посета.
Ова значи натамошна европеизација на Западен Балкан, рече Рен и изрази надеж дека на трите земји наскоро ќе им се придружат и Албанија и Босна и Херцеговина.
Баро и Рен изразија убедување дека Советот на ЕУ ќе ја усвои препораката за укинување на визите, бидејќи таа е донесена врз основа на ригорозни услови кои гарантираат безбедност.
Во првичните консултации со државите членки на ЕУ сите дадоа поддршка на укинувањето на визите, рече Рен, одговарајќи на новинарско прашање, дали Грција ќе ја прифати визната либерализација за Македонија.
Европската комисија наведува дека денешниот предлог им овозможува на граѓаните на Македонија, Црна Гора и Србија да патуваат во земјите од шенген зоната со новите биометриски пасоши.
ЕК додаде дека може да препорача укинување на визите и за Албанија и БиХ до средината на идната година. /крај/мп/ил
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: Пожарот во Самоков веднаш изгаснат, објектите на фабриката не беа во опасност

Пожарот во Самоков е локализиран и веднаш изгаснат. Во ниту еден момент немаше опасност од негово ширење кон објектите на фабриката Самоков, соопшти Центарот за управување со кризи.
Од РЦУК Македонски Брод претходно стигна информација дека е настанат пожар во населбата Самоков, во фабриката „Сувенир“, а опожарен е магацин со хемикалии. Во информацијата беше наведено дека електричната енергија во фабриката е исклучена.
Македонија
„Седи Боби, кец!“, му рече Арсовска на Стефковски за проблемот со водата, па доби одговор

Градоначалничката на Град Скопје, Данела Арсовска, преку објава на својот официјален профил на Фејсбук, му возврати на градоначалникот на општина Гази Баба, Бобан Стефковски, кој претходно ги прозва Градот и ЈП „Водовод и канализација“ – Скопје, за прекините во водоснабдувањето во неколку скопски населби. Тој побара итна интервенција од Градот, предупредувајќи на можни протести ако состојбата не се реши веднаш.
Арсовска му одговори на Стефковски дека и по три години на функција сè уште не прави разлика што е во надлежност на Градот, а што на Општина Гази Баба. Таа појасни дека жителите на Црешево и Смилковци не се корисници на ЈП „Водовод и канализација“, туку на ЈКП „Гази Баба“ – претпријатие под општинска надлежност.
„Ова по три години ќе го знаеше ако паузираше еден ден од сликање по фолклорни манифестации за да сработиш нешто“, напиша Арсовска, посочувајќи дека со средствата добиени од владите на Ковачевски и Мицкоски, Стефковски можел да изгради нова водоводна мрежа за тие населби.
Во продолжение, Арсовска рече дека Град Скопје во изминатите три години не добил ниту еден денар од централната власт, а дека Владата ѝ должи на ЈСП Скопје осум милиони евра.
Градоначалничката ја заврши објавата со саркастичен тон: „Седи Боби, кец!“
Ситуацијата дополнително ја заостри реториката меѓу градоначалниците на Скопје и Гази Баба, отворајќи нова рунда меѓусебни обвинувања. По објавата на Арсовска, повторно се огласи Стефковски кој и’ одговори дека надлежноста за Смилковци и Црешево ја знае многу добро, па ја повика да каже зошто жителите од Автокоманда, Железара, Триангла, Маџари и Ченто немаат вода? За крај по однос на делењето оценки, Стефковски на социјалните мрежи напиша дека граѓаните и’ дале оценка на парламентарните избори на Арсовска. Тогаш таа освои вкупно 3.438 гласови.
Македонија
Гори кај Прилеп, Македонски Брод, Чашка и Велес – пресек на состојбата со пожарите

На територијата на државата се евидентирани вкупно осум пожари на отворен простор, од кои активни се четири, соопшти Центарот за управување со кризи.
Во Општина Прилеп, гори кај селото Бешиште. Се работи за приземен пожар во квалитетна мешана шума. Активен е пожарот и кај Општина Македонски Брод, с. Црешнево, м.в. Церо Поле – пожар во деградирана дабова шума и грмушки. Во Општина Чашка беснее шумски пожар под Солунска Глава, помеѓу местата викани Изворите на Бабуна и Бабина Дупка (моментално нема активен пламен, само чад на карпест дел). Во Општина Велес пожарот избувна во ниска вегетација.
Изгаснати се 4 пожари: Општина Врапчиште, с. Врањовци – ниска вегетација, ѓубриште; Општина Липково, с. Лојане – ниска вегетација и стрниште; Општина Карбинци, с. Радање – блок (површина) посеана со жито и ниска вегетација и ОпштинаАрачиново, с. Орланци – ниска вегетација и отпаден материјал.