Во последните 24 часа во Македонија се потврдени 890 нови случаи на коронавирус, 35 лица починаа, а оздравени се 1.024 пациенти, соопшти Министерството за здравство.

Во последните 24 часа се направени 3.284 тестирања, а регистрирани се 890 нови случаи на Ковид-19 во:
Скопје – 349, Битола – 68, Куманово – 59, Прилеп – 52, Тетово – 36, Струмица – 35, Велес – 32, Охрид – 29, Кавадарци – 27, Штип – 25, Кочани – 24, Кичево – 20, Гостивар – 19, Виница – 15, Гевгелија – 14, Неготино и Валандово – по 11, Струга, Свети Николе и Радовиш – по 9, Пробиштип – 7, Крива Паланка – 6, Ресен и Берово – по 4, Делчево и Демир Хисар – по 3, Богданци, Демир Капија и Кратово – по 2, Крушево, Македонски Брод, Пехчево и Дојран – по 1.

Пријавени се вкупно 35 починати лица: 7 од Скопје (35г, 39г , 61г, 69г, 73г, 80г ,84г), 6 лица од Куманово (65г, 70г, 73г, 74г, 76г и 87г), по 3 починати лица од Прилеп ( 71г,72г и 77г) и Битола (64г,65г и 74г), по 2 лица од Кавадарци (75г и 76г), Велес (53г и 79г), Штип (67г, 69г), Струмица(54г и 84г), Крива Паланка(71г и 72г) и Струга(62г и 72г), по едно лице од Гостивар (77г), Кочани (34г), Кичево (57г) и Охрид (77г).

Сите се починати во болнички услови.

Досега во земјата се направени вкупно 681.272 тестирања на Ковид-19.

Вкупната бројка на Ковид-дијагностицирани лица во нашата земја од почетокот на епидемијата изнесува 145.001, бројката на оздравени пациенти е 120.707, на починати е 4.357, а бројот на активни случаи изнесува 19.937.

Заменик-претседателот на Владата задолжен за европски прашања, Никола Димитров, ја заокружи еднодневната работна посета на Австрија со средба со федералниот министер за надворешни работи, Александар Шаленберг.

Димитров нагласи дека прашањето за почнување на преговорите на земјата за полноправно членство во ЕУ има силни геополитички импликации за Унијата како проект за европско обединување и укажа на загриженоста за негативното влијание на секое понатамошно одолжување на пристапните преговори врз кредибилитетот на ЕУ во регионот, а со тоа и на улогата на Унијата како глобален актер.

„Ова е клучен момент за постигнување чекор напред во евроинтегративниот процес на Северна Македонија со ЕУ, што би значело и преточување на интересот на Австрија како непосреден сосед на регионот на Западен Балкан во конкретен резултат базиран на објективно вреднување на копенхашките критериуми“, рече Димитров.

Министерот Шаленберг ја поздрави посветеноста на земјата во спроведување на реформите што значат вистинско приближување кон европските стандарди и нагласи дека поддршката и интересот на Виена за заеднички успех е сосема јасна.

Соговорниците разменија мислења за продлабочување на билатералната соработка, која се одвива во рамките на континуирана техничка помош, но и преку економската и инвестициската рамка, како и хуманитарната помош во контекст на ковид-кризата. Димитров се заблагодари за солидаризирањето на Австрија со регионот уште од самиот почеток на здравствената криза, информираат од неговиот кабинет.

„Во овие тешки времиња што ги предизвика пандемијата, пријателската помош е повеќе од добредојдена и во тој контекст би сакал да упатам благодарност за континуираната политичка и економска поддршка, но и значајната помош за секторот здравство од Австрија“, истакна Димитров на средбата.

Лидерот на опозицијата, Христијан Мицкоски, на денешниот брифинг со новинарите обелодени нов скандал со назив „Мафија 2“, кој се однесува на злоупотреба на институциите, при што едно лице е заведено со два матични броја.

Според неговата информација добиена од свиркачи, во Македонија има најмалку 20.000 лица што имаат по два ЕМБГ.

Тој го повика министерот за внатрешни, Оливер Спасовски, и надлежните институции да одговорат како и кога се издадени овие двојни матични броеви, кои, според него, се користеле за разни злоупотреби, пред сѐ, за гласање на избори затоа што овие лица ги има во Избирачкиот список.

„Покрај аферата ‘Мафија’, каде што структури на власта издавале документи за идентификација на криминални структури, на познати балкански босови, во оваа афера може да се види дека едни исти лица имаат два матични броја. Како што може да се забележи, едно исто лице со двоен матичен број го има по два пати во Избирачкиот список. Според проверките во Избирачкиот список, истото лице е регистрирано на своето вистинско име, вистинска адреса, а вториот пат е регистрирано на друго лице во друга општина, при што првичните броеви се исти, а последните три се разликуваат. Конкретно, при проверката на терен за лицето Џадин Адемовски, кој на една адреса се води во Чаир, а на другата во Сарај, кога го побаравме Џадин на првата адреса, таму ни кажаа дека овој човек не живее тука, дека не постои такво лице. Ова е класична злоупотреба на институциите и тежок криминал за кој треба да се сноси одговорност“, рече Мицкоски.

Тој јавно праша како може да постои вакво нешто кога во 2016 година по барање на тогашната опозиција беше прочистен Избирачкиот список, а министер беше Оливер Спасовски.

Дополнително, на новинарско прашање зошто ВМРО-ДПМНЕ, која учестуваше во акцијата за прочистување на Избирчкиот список, не реагирала, тогаш Мицкоски рече: „Или во 2016 година не бил прочистен Избирачкиот список како што треба или што е полошо и остава сомнеж – овие матични броеви се впишувани во последните 4-5 години поради криминални дејства во кои власта директно учествувала. Трето објаснување нема. Затоа, наместо Спасовски да се занимава од каде ми се овие информации, нека се заземе да го истражи случајот и да излезе со конкретни одговори. И да не се правда пред јавноста дека оваа било проблем од 1986 година затоа што Списокот се прочистуваше, а тој цело време е министер, тогаш се наметнува прашањето колку вакви избирачки списоци потпишал? Освен тоа, симптоматично е и како 100.000 обрасци му недостигаат на директорот на Упрвата за водење на матичните книги. Остава отворен сомнеж дека оваа операција се случувала во последните 4 години, при што само последните три бројки се менувани, а некој, најверојатно, тоа го правел намерно и со конкретна цел“, објасни Мицкоски.

Мицкоски додаде дека издавањето дипликат матични броеви е поврзано со скандалот „Мафија“, со цел да им се помогне на криминални босови, како Седат Пекер, и водачот на Шкаљарскиот клан, Јовица Вукотиќ, кои поседувале фалсификувани патни исправи издадени во Македонија.