Македонија
Обемна едиција за „Егејското прашање“
Вистината за „егејското прашање“ и страдањата на Македонците за време и по војна во Грција (1945-49) ќе бидат објавени во обемна едиција
Вистината за „егејското прашање“ и страдањата на Македонците за време и по војна во Грција (1945-49) ќе бидат објавени во обемна едиција чија промоција започна денеска.Здружението на децата бегалци од Егејскиот дел на Македонија попладнево во Скопје ги промовираше првите две изданија под наслов „Петте судбоносни години во Егејска Македонија“ од покојниот историчар Ристо Кирјазовски и „Голготата на Македонците во Грција“ од новинарот и публицист Виктор Цветановски.„Ова е почеток на промовирањето на дваесетина наслови посветени на Егејска Македонија, со поддршка на Владата, Собранието и на други институции во земјата. Се одлучивме да направиме едиција од вкупно 25 наслови, по повод 60 години од завршувањето на Граѓанската војна во Грција“истакна на промоцијата претседателот на Здружението на децата бегалци од Егејскиот дел на Македонија Ѓорѓи Ајановски.„Постхумното издание на монографијата „Петте судбоносни години во Егејска Македонија“ од Ристо Кирјазовски е огромен исчекор во потрагата по вистината во разоткривањето на заговорот против егејските Македонци и лоцирање на виновниците за етничкото чистење во Егејска Македонија“, беше посочено на денешната промоција.За делото „Голготата на Македонците во Грција“ беше истакното дека во насловот содржи библиска метафора за страдањата на егејските Македонци и потресни лични сведоштва.Други две изданија од едицијата, под наслов „Просветата во Егејска Македонија“ и „Проучување на егејските дијалекти“ ќе бидат промовирани на 30 септември во Институтот за македонски јазик во Скопје. Најавен е и уште еден голем проект, анкетирање на сите Македонци учесници во Граѓанската војна во Грција и на Децата- бегалци. Нивните сведоштва за преживеаната голгота ќе бидат објавени во двојазични томови, на македонски и на англиски јазик./крај/ег/.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Се оддалечуваме од Европа поради политиките на власта, му рекол Филипче на известувачот Томас Вајц
Претседателот на СДСМ, Венко Филипче, денеска одржал состанок со постојаниот известувач на Европскиот парламент за Северна Македонија, Томас Вајц. На состанокот, како што информираа од партијата, станало збор за актуелната политичка состојба и за евроинтеграцискиот процес на државата.
Филипче изразил благодарност за ангажманот на ивестувачот на ЕП, Вајц, во следењето на процесот, како и за поддршката на Европската Унија и Европскиот Парламент за европската перспектива на нашата држава.
„На средбата, Филипче посочи дека статусот во кој се наоѓа евроинтеграцискиот процес на Македонија е сериозно загрижувачки, реформската агенда е закочена, реформите не се спроведуваат, а власта не покажува волја за продолжување на европскиот пат. Тој додаде дека наместо напредок кон европскиот пат, државата поради политиките на власта се соочува со стагнација, блокирани реформи и политики кои ја оддалечуваат државата од европските стандарди“, велат од СДСМ.
Филипче нагласил и дека европската интеграција за Македонија значи процес што го зајакнува владеењето на правото, гради функционални институции и обезбедува подобар живот за граѓаните, а Македонија заслужува да се движи напред, а не да губи време и да остане изолирана.
Воедно, Филипче порачал дека СДСМ останува цврсто посветена на европските вредности и реформи, бидејќи иднината на Македонија во Европската Унија, тоа е клучот за подобра, праведна, просперитетна и напредна држава, за подобра иднина за сите граѓани.
Македонија
За возачка дозвола доволно е завршено основно образование, рече Јаневска по протестите
Министерката за образование и наука Весна Јаневска изјави дека за полагање возачки испит е потребно најмалку завршено основно образование, нагласувајќи дека државата обезбедува можности.
„Образованието е бесплатно и за оние што ја надминале возраста, така што до 29 години тие преку Центарот за образование добиваат едукација. Сме имале и проекти со наши странски партнери преку кои Ромите што биле заинтересирани да го дополнат своето образование добиле некаква едукација соодветна на барањата на пазарот на трудот, нивните лични потреби итн“ рече Јаневска одговарајќи на новинарско прашање. Додаде и дека Министерството финансира околу 40 ромски медијатори со цел зголемување на опфатот и редовното присуство на ромските деца во училиштата.
Изјавата доаѓа по протестите на граѓани кои побараа ослободување од обврската за полагање возачки испит бидејќи немаат неопходен степен на образование, а автомобилите им се неопходни.
Македонија
Дожд и облаци утре, постудено на почетокот на следната седмица
Времето утре ќе биде променливо облачно. Во западните делови ќе има врнежи од дожд, а попладне услови за дожд ќе има и во источните делови. Ќе дува слаб до умерен ветер од јужен правец. Минималната температура ќе биде во интервал од 2 до 6, а максималната ќе достигне од 8 до 14 степени.
Во Скопје, облачно со услови за повремени врнежи од дожд. Ќе дува слаб ветер со променлив правец. Минималната температура ќе се спушти до 4, а максималната ќе достигне до 11 степени, најавува УХМР.
Утре ќе се задржи променливо облачно време наместа со повремен слаб дожд освен во западните делови каде што ќе биде облачно со врнежи од дожд кои ќе бидат со пообилен интензитет (над 15 l/m²). Ќе дува умерен, повремено засилен ветер. Нови врнежи ќе има во недела и почетокот на следната седмица кога ќе настапи заладување со повремени врнежи од дожд, а на планините и во некои од повисоките места од снег.

