Семинарот за влијанието и терминологијата на правото на Европската унија и влијанието врз македонскиот јазик започна денеска во Скопје

Семинарот за влијанието и терминологијата на правото на Европската унија и влијанието врз македонскиот јазик – „Евроинтеграциите и македонскиот литературен јазик започна денеска во Скопје.

„Овој процес се одвива во клучните моменти за Република Македонија кога сите сме во исчекување на добивањето на датум за преговори со ЕУ. Една од многуте придобивки од членството во Европската унија е што македонскиот јазик ќе добие статус на официјален јазик во Унијата. Исто така, ова е можност за развој и збогатување на нашиот јазик и неговата стручна терминологија и со тоа, недвосмислено толкување на правото на ЕУ, како и усогласување на националното законодавство со законодавството на Европската унија“, истакна на отворањето заменик-претседателот во Владата задолжен за евроинтеграции Васко Наумовски.

На семинарот кој се одржува денеска и утре во Клубот на пратеници, МАНУ и Филолошкиот факултет има 100 учесници, а предавањата ќе ги држат: проф. д-р Лидија Тантуровска, Институт за македонски јазик, академик Владо Камбовски, проф. д-р Татјана Панова-Игњатовиќ, Катедра за преведување и толкување при Филолошкиот факултет „Блаже Конески“ – Скопје и проф. д-р Славица Велева, Катедра за македонски јазик при Филолошкиот факултет „Блаже Конески“ – Скопје.

Целта на семинарот, кој го организираат Секретаријатот за европски прашања и норвешката национална програма НОРМАК е запознавање и обучување на целните групи со начините и правилата за утврдување на терминологија по стандардите и во духот на македонскиот јазик, како и подобрување на нивото на квалитет на преводите на правото на ЕУ преку соработка со сите надлежни институции и учесници во процесот на подготовка на национална верзија на Acquis communautaire. /крај/ед/мп