Голема воена вежба насловена „Македонски блесок 05“ ќе биде изведена во периодот од 19. до 28. октомври во касарните…

Голема воена вежба насловена „Македонски блесок 05“ ќе биде изведена во периодот од 19. до 28. октомври во касарните „Илинден“ во Скопје, „Јане Сандански“ во Штип и на полигонот „Криволак“. На вежбата единиците ќе бидат оценувани според НАТО стандардите – Самооценување Ниво 2 CREVAL, со што ќе се знае дали одредена единица е оспособена за извршување мисија. На вежбата „Македонски блесок 05“ ќе учествуваат околу 1.000 припадници на АРМ, од кои 730 ќе бидат оценувани, додека останатите ќе пружаат логистичка поддршка. Главни учесници на вежбата ќе бидат декларираниот среден пешадиски баталјон од 1.механизирана пешадиска бригада, како и декларираната чета на воена полиција од баталјонот на воена полиција. Освен македонските оценувачи, на вежбата ќе присуствуваат и претставници на НАТО од Командите во Неапол и Мадрид, кои ќе ја контролираат работата на оценувачите. „На крајот на вежбата единиците добиваат оценка ’Подготвена’ или ’Неподготвена’. Ако се добие позитивна оценка, тоа значи дека единицата е целосно пополнета со персонал, обучена, опремена и обезбедена со потребните ресурси и резерви во организациска смисла“, изјави потполковник Ѓоко Максимов, кој е главен на оценувањето. Според директорот на вежбата, полковник Митре Стојанов, добро е единиците максимално да ги извршат зададените задачи, бидејќи од нивната подготвеност, зависи како ќе се грижат за својата, но и безбедноста на своите колеги при мировни мисии во странство. „Не смееме да се доведеме во ситуација да не бидеме подготвени во одредена ситуација, бидејќи на тој начин ги оставаме и нашите партнери незаштитени“, вели Стојанов. Ова е прва вежба од ваков поголем формат, бидејќи како што најавуваат од АРМ, ќе земат учество поголем број војници, опрема и вооружување, а на полигонот „Криволак“ ќе се употребува и боева муниција. Доколку единиците на АРМ успешно ја завршат вежбата, се стекнуваат со оспособеност која ја немаат и некои армии членки на НАТО. /крај/ст