Македонија
Маврово работи, Шапка изненадена од снегот – Кожув затворен

На скијачкиот центар Заре Лазаревски се отворени сите три жичарници и 11 ски лифтови. На Попова Шапка се изненадени од снегот и центарот делумно функционира додека Кожуф е недостапен поради проблеми со пристапниот пат.
Бедна е зимската понуда од ски центрите во Македонија. Од неколкуте ски центри во Македонија, функционира само Маврово, и некои помали центри како Осогово, чии два ски лифта работеле предходниот викенд. Крушево исто така работи но снегот не е доволен за скијање под жичарата.
На скијачкиот центар Заре Лазаревски се отворени сите три жичарници и 11 ски лифтови, а после интензивните снежни врнежи што почнаа да паѓаат во вторник наутро патеките забрзано се подготвуваат. Таму во моментов има 40 сантиметри снег.
“Потребно е еден ден новопаднатиот снег да се обработи и да ферментира по што ќе биде подготвен за скијање. Машините за обработка на снегот работат со полн капацитет за да ги подготват терените во пресрет на двата неработни дена кога очекуваме и наплив на гости”, рече Иван Симески од скијачкиот центар Заре Лазаревски на Маврово.
Дневната карта со неограничен пристап до терените и ски лифтовите таму чини 1.300 денари за возрасни и 900 за деца.
Од планинарскиот дом на Шара Ски пак велат дека и тие забрзано го обработуваат снегот и се подготвуваат за прием на гостите што ќе дојдат за време на празниците.
„Сите терени и ски лифтови се отворени и подготвени за скијање. Снегот кој од утринава интензивно паѓа уште од 6 часот се обработува со ратраци. Пристапот до зимскиот центар е комплетно прооден“ – рече Ивица Наумовски од планинарскиот дом Шара Ски.
Но, наспроти ваквите информации гостите на Попова Шапка се жалат дека често добиваат погрешни информации за подготвеноста на терените. Во моментов работат само ски лифтовите Тетекс и Аеродром.
Во моментов на Шапка има 70 сантиметри снег , а екипи на Македонија пат го расчистуваат приодот до скијачкиот центар. Дневната карта таму ќе чини 800 денари, а полудневната 600 денари.
На скијачкиот центар Кожув сеуште е неизвесно дали оваа сезона ќе има скијање. Во известувањето од веб сајтот Ски-Кожув се вели дека поради свлечишта на земјиштето на техничкиот пат, кој во предходните две години се користеше за пристап до скијачкиот центар е ризичен и тешко прооден. Тоа за Макфакс го потврди и Љубинко Петров од Ски Кожуф.
Ски лифтовите и патеките се затворени, а бројот на гостите е сведен на минимум./крај/вм
Фото: Попова Шапка за време на Новогодишните Празници/Анита Палческа за Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.