И во текот на вчерашното деноноќие, екипите на ЈП Комунална хигиена-Скопје во три смени реализираа активности за рачно и машинско чистење на снегот и мразот на булеварите и поголемите улици во сите скопски општини, како и во пешачките зони во централното градско подрачје, велат од Комунална хигиена-Скопје.

Воедно, во скопската општина Чаир беа спроведени и вонредни активности за отстранување неколку диви депонии лоцирани на улиците Џон Кенеди – до ООУ „Васил Главинов“, Славеј Планина – во непосредна близина на скопското Теќе и булеварот Крсте Мисирков – зад т.ц. Мавровка.

Во рамките на овие активности беа подигнати и транспортирани вкупно 50 кубни метри непрописно одложен отпад, соопшти Комунална хигиена-Скопје.

„Во услови кога цените на основните производи растат во континуитет, а граѓаните едвај врзуваат крај со крај, актуелната власт повторно нуди неуспешни „решенија“ кои не ги менуваат основните економски реалности. Основните продукти станаа луксуз, граѓаните осиромашуваат, додека трговците акумулираат милионски профити и рекордна заработувачка“, велат од партијата Левица.

„Од анализата на цените на основните производи, забележуваме огромни зголемувања – свежото месо и млечните производи поскапеле од 15 до 80 отсто, а синдикалната минимална кошничка во 2024 година изнесува над 62.000 денари. Отсуството на регулатива и државна интервенција овозможија слободниот пазар да сервира нова порција богатење на елитите, врз грбот на граѓаните.

Големите трговски ланци, го зголемија својот профит за неверојатни 16,6 отсто за само три години. Ова покажува не само дека пазарот е нерегулиран, туку е и манипулиран, а инфлацијата, во најголем дел вештачки создадена. Владините мерки како „замрзнување на цените“ или „новогодишни кошнички“ се покажаа како симболични и неефективни мерки, за дневно-политичко залажување на граѓаните.

Наместо козметички мерки, Левица предлага: Ограничување на профитните маржи – задолжително и на долг рок, со редовна контрола од страна на инспекциските служби; Укинување на ДДВ за основните производи – директна помош за граѓаните; Зголемување на минималната плата на 450 евра – за приближување на животниот стандард кон оној во регионот; Реструктурирање на увозната зависност преку поддршка на домашното производство.

Македонскиот народ заслужува системски решенија кои ги надминуваат економските предизвици. Политичките мерки што служат за дневна пропаганда, не даваат никаков резултат. Време е да ја поставиме економијата на правилна основа во корист на народот. Во спротивно, овој економски концепт, продолжува да слугува само на мала група луѓе поседници на крупниот капитал, којшто непрекинато го зголемува јазот помеѓу богатите и сиромашните“, соопшти партијата Левица.

СДСМ го разбира револтот на работниците во јавниот сектор и ги поддржува нивните барања за покачување на платите кои се целосно оправдани. Владата има обврска да обезбеди услови за потпишување на колективните договори и зголемување на платите. Платите стагнираат, куповната моќ на работнците се намалува, а политиките на Владата на Мицкоски се сведуваат на служење на тесни бизнис интереси на елитата, велат од СДСМ.

„Во изминатите седум месеци, минималната плата остана непроменета, додека просечната плата стагнира. Системот за зголемување на платите, воспоставен од СДСМ, беше целосно напуштен од актуелната власт, што резултираше со влошување на животниот стандард на работниците. Последните податоци од Државниот завод за статистика потврдуваат тежок економски контекст во кој се наоѓаат работниците. Во декември 2024 година, трошоците за живот пораснаа за 4,4%, цените на основните производи се зголемија за 4,3%. Ова значи дека месечните плати не се доволни ниту за основните потреби. Дополнително спорно е тоа што вработените во дел од јавниот сектор и министерствата се дискриминирани во однос на нивните колеги во други институции како Министерството за финансии, Службата за општи и заеднички работи на Влада, Генералниот секретаријат во Владата, кои добиле покачувања на платите“, посочуваат од партијата.

СДСМ, како што велат се на страна на работниците и бараат од Владата итно да преземе чекори за зголемување на платите како и да обезбеди целосна рамноправност меѓу вработените во јавниот сектор.

„Потпишувањето на колективните договори, согласно барањата на работниците, мора да биде приоритет. СДСМ и во изминатиот период, но и како власт, покажа дека ги разбира потребите и докажа што значи вистинска грижа за стандардот на работниците. Со низа на мерки и политики кои успешно ги реализиравме платите системски се покачуваа во сите сектори, трудот на работниците се ценеше и почитуваше. За период од 7 години СДСМ ја зголеми минималната плата од 8.000 денари на над 20.000 денари а просечната плата од 22.000 денари на над 42.000 денари. И како опозиција СДСМ предлагаше амандмани во Собранието за покачување на платите во различни сектори, за покачување на минималната плата, но власта тоа го одби. Работниците заслужуваат власт која ќе го слуша нивниот глас, која ќе се грижи за нивните потреби и која ќе ги штити нивните интереси а не интересите на елитата“, завршуваат од СДСМ.