Нема пријавено исчезнати лица по големата лавина и лизгање на земјиштето што се случи вчера во регионот на Долна Река, при што целосно е блокиран патот Маврово-Дебар.

Нема пријавено исчезнати лица по големата лавина и лизгање на земјиштето што се случи вчера во регионот на Долна Река, при што целосно е блокиран патот Маврово-Дебар. Надлежните служби засега немаат информации дали во моментот на лавината имало возила на делницата Ростушки мост-Жировница. Според првичните информации на стручните служби има над 70.000 метри кубни земја, камења, дрвја и снег, а само на патот има над 20.000. Реката Радика утрово е заматена и таа вчера по 14:30 часот во овој дел од нејзиниот тек беше пресечена за еден час, поради што дојде до девијација на коритото. Според Деар Лимановски од подрачната единица на „Македонија пат“, лизгањето на земјиштето е стабилизирано, а уште вчера попладне започнато е расчистувањето на наносите. Чистењето засега оди бавно, иако патот го расчистува механизација на „Македонија пат“, заедно со механизација на неколку поголеми претпријатија од регионот. Живко Алексовски, вработен во бензинската пумпа „Макпетрол“, која се наоѓа на само 200 метри од местото каде што се случи лизгањето, синоќа изјави дека тоа била најстраотната глетка во неговиот живот. „Прво се почувствува тресење на земјата, па помислив дека е земјотрес. Во следниот момент се слушна татнеж и кога излегов да видам што се случува, ме турна силен ветер што доаѓаше од планината која се рушеше…“, рече Алексовски. Тој додава дека пред само една минута видел како пред пумпата поминал минибус на превозното претпријатие „Ростуше“, кое доаѓало од Гостивар. /крај/мн/ст