Македонија
Aмбасадата на САД донира опрема од 460.000 долари за МВР
Aмбасадата на САД донира 460.000 долари за Министерството за внатрешни работи. Донацијата се состои од медицинска опрема и опрема за лична заштита и компјутерска опрема наменета за Секторот за компјутерски криминал и дигитална форензика.
„Денешната вредна донација, за која упатувам искрена благодарност до Амбасадата на САД во нашата земја и до владата на САД, е уште еден доказ за нашето цврсто партнерство со владата на САД, со нејзините институции, кои сите овие години од нашата самостојност ни ја даваат својата максимална поддршка, но и помош во реформските зафати и во осовременување на капацитетите на Министерството, што е показател за заедништвото во остварувањето на стратешките цели на Република Северна Македонија – наше целосно евро-атлантско интегрирање и уште една потврда за заедничките вредности што ги споделуваме“, истакна министерот за внатрешни работи, Оливер Спасовски, на свеченото примопредавање на донацијата во Полицискиот центар „Ѓорче Петров“.
Донацијата се состои од два сегмента, и тоа медицинска опрема и опрема за лична заштита за припадниците на Единицата за брзо распоредување при МВР, вредна приближно 250.000 долари, и опрема наменета за Секторот за компјутерски криминал и дигитална форензика при МВР во вредност над 200.000 долари.
„Станува збор материјални средства, за хардвер и софтвер, што уште повеќе ќе ги подигнат стандардите во работењето на овие две полициски организациски единици и дополнително ќе нѐ придвижат до посакуваната цел, а тоа е градење и етаблирање кредибилна, технички и кадровски модерна и динамична полиција, која ќе биде подготвена да се соочи со каква и да е задача поставена пред неа“, рече Спасовски.
Амбасадорката на САД, Кејт Мери Брнс, посочи дека Република Северна Македонија продолжува да биде извонреден партнер во борбата против тероризмот.
Според неа, донираната компјутерска опрема ќе помогне да се подобрат процесирањето и анализата на дигиталните докази, а донираната медицинска опрема ќе биде од полза на полициските службеници на терен, во фронталните линии, во подобрување на подготвеноста да одговорат на случаи на траума и спасување животи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Следува период на стабилно и релативно топло време за овој период од годината
Времето утре ќе биде сончево со мала до умерена локална облачност. Ќе дува слаб до умерен, а долж Повардарието засилен ветер од северен правец.
Минималната температура ќе биде во интервал од 9 до 18, а максималната ќе достигне од 19 до 26 степени.
Во Скопје сончево со мала до умерена облачност. Ќе дува умерен ветер од северен правец. Минималната температура ќе се спушти до 14, а максималната ќе достигне до 25 степени.
Следува период на стабилно и релативно топло време за овој период од годината.
Македонија
Сиљановска Давкова се обрати на Свечената академија по повод 11 Октомври – Денот на народното востание
Претседателката Гордана Сиљановска Давкова денеска се обрати на свечената академија по повод 11 Октомври – Денот на народното востание, што под нејзино покровителство се одржа во Музејот на македонската борба за самостојност.
„Во историјата на секој народ постојат периоди на големи премрежја што можат да се пребродат само со храбри одлуки. Таков мрачен период беше Втората светска војна, кога речиси цела Европа беше под фашистичка окупација, и кога Хитлер и неговите сојузници изгледаа незапирливи и непобедливи. Во такви услови, на 11 октомври 1941-та, македонскиот народ посегна по непресушното човеково право на отпор против опресијата, неправдата и окупацијата и храбро, без колебање, ја избра вистинската страна во најголемата војна во историјата на човештвото. 11 октомври е меѓникот што ја одреди нашата иднина, денот кога ние храбро и одлучно се вклучивме во антифашистичката коалиција на слободољубиви и правдољубиви народи.
Херојската борба против фашизмот нè сплоти, нè прероди и ни даде легитимитет како народ да се самоопределиме и да создадеме слободна македонска држава на Првото заседание на АСНОМ. Како еден од најголемите демократски триумфи на човештвото, антифашизмот ни овозможи на историската сцена да настапиме рамноправно и со чиста совест да учествуваме во обновата на разрушениот свет. Не случајно, македонската држава за која копнееја Илинденците и за која се изборија антифашистите, трае веќе 80 години. Нејзината сегашност и нејзината иднина се сраснати со нејзиното минато“, рече Сиљановска Давкова.
„Нас никој не нѐ ослободи. Сами се ослободивме со помош на над 110-илјадната Народноослободителна војска на Македонија. Нам никој не ни ја подари државата. Сами се изборивме за неа. За нас, антифашистичката беше и истовремено и народноослободителна војна во која дадовме 24.000 жртви.
Затоа, ние не смееме да дозволиме историски ревизионизам и релативизирање на народноослободителната и антифашистичка борба, бидејќи со тоа би се поткопале илинденските и антифашистичките темели врз кои е изградена македонската држава. Со тоа би се обезвреднила жртвата на илјадници млади борци кои несебично гинеа за слободата и правдината. Ние тоа не смееме да го дозволиме“, изјави Сиљановска Давкова.
Во рамки на Свечената академија настапи Воениот оркестар на Армијата со сплет на македонски патриотски и партизански песни.
Македонија
Ахмети со чешкиот амбасадор Лудва: Земјата се оддалечува од Европа, да се вратиме на правец кон Брисел
Претседателот на Демократската унија за интеграција, Али Ахмети, во Тетово се сретна со чешкиот амбасадор во Скопје, Јарослав Лудва.
Претседателот Ахмети и амбасадорот Лудва главно разговараа за интеграцијата на земјата во обединета Европа и петте приоритети кои ги објави Ахмети.
„Уставните измени и продолжувањето на европскиот пат е приоритет над приоритетите на Ахмети, Демократската унија за интеграција и Албанците, но тоа треба да биде приоритет за сите.
Ветингот за политичари, судии и обвинители со меѓународен мониторинг, проверка на богатството и имотот ма сите носители на јавни функции, истрагата за приватизацијата и олигархијата креирана од тој процес, се предуслови за неселективно владеење на правото и стопирање на политички лов на вештерки со партиска пропаганда“, соопшти ДУИ.
„ДУИ не е заинтересирана да биде дел од владата, но ќе продолжи да алармира дека на власта и недостасува етнички легитимитет и тоа ги прави владините одлуки моноетнички.
Претпочитаните и преференцијални Албанци предизвикуваат непоправливи последици
Северна Македонија е мултиетничка земја и има потреба од хармонија меѓу двете мнозински заедници, Албанците и Македонците. Взаемното почитување е почетна точка за стабилност, стабилност, безбедност и одржлива иднина на земјата.
Системското кршење на Охридскиот договор од страна на Владата и Уставниот суд е неприфатливо и е алармантно за општеството и мултиетничкиот карактер на државата“, се додава во соопштението на ДУИ.