Македонија
Aрсовска најавува изградба на мегапаркови во повеќе скопски општини

Независната кандидатка за градоначалник на Скопје, поддржана од ВМРО-ДПМНЕ, Данела Арсовска, се заложи за изградба на паркови во скопските општни Гази Баба, Чаир, Аеродром, Кисела Вода и во Ѓорче Петров по примерот на Градскиот парк.
Според Арсовска, потребата од ваква мерка се наметнува поради негрижата за Градскиот парк изминативе години.
„Имав можност да разговарам со луѓето што ќе бидат дел од идната локална власт во општините во градот Скопје и токму на оние места каде што заеднички разговаравме и дискутиравме дека има просторни можности, таму да се направат парковите. Меѓутоа, и не само на тие локации. Понатаму, во секој случај ќе имаме можност да разгледуваме и договараме со скопјани дали ним тоа им одговара, иако јас верувам дека никој нема да има ништо против тоа да имаат навистина убав и голем парк во своето маало“, одговори Арсовска на новинарско прашање на денешната прес-конференција.
Кај дел од експертската јавност сепак постојат сомнежи во ваквите најави поради потребата од менувањето на детаљните урбанистички планови на секоја општина одделно за вцртување паркови, па и на Генералниот урбанистички план на Град Скопје, кој е документ што ги обединува сите ДУП-ови.
Арсовска не откри колку би чинеле и колкава површина би зафаќале ваквите површини имајќи предвид дека се работи за т.н. мегапаркови.
Таа нагласи дека ќе се посвети и на изградба на 20 помали паркови, во секое од населените места, но засега нема детали дали парковите би се граделе на приватно или јавно земјиште и како Градот финансиски би го поднел тоа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце за излез од државата се чека по 20 минути

Сообраќајот на државните патишта се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 20 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Притвор за уште едно лице од групата која е под истрага за злосторничко здружување, даночно затајување и перење пари

Управата за финансиска полиција информира дека во текот на вчерашниот ден, 28.08.2025 година, на граничниот премин „Долно Блаце“, при обид за влез во РСМ, е лишен од слобода С.А., државјанин на Р.Косово, за кој постои основано сомнение дека сторил кривично дело „Злосторничко здружување“ (чл.394 ст.2) и кривично дело „Даночно затајување“ (чл.279 ст.3).
Од страна на овластени службени лица од Управата за финансиска полиција, лицето веднаш било превземено и изведено пред судија на претходна постапка од каде му била определена мерка притвор во времетраење од 30 дена, по што истиот е спроведен во КПУ Куманово.
Притворањето, појаснуваат надлежните, е продолжение на акцијата од 25 август, кога беа притворени седум лица, како резултат на сложена предистражна постапка спроведена од страна на Управата за финансиска полиција, под раководство и во координација со надлежен јавен обвинител од ОЈО ГОКК, во рамки на која беа превземени низа мерки и активности и беше обезбеден обемен доказен материјал, што резултираше со поднесување на кривична пријава против 13 физички лица и 10 правни лица, за сторени кривични дела: злосторничко здружување, даночно затајување, даночна измама и перење пари и други приноси од казниво дело, со што е предизвикана огромна штета на државниот буџет во висина од над 430 милиони денари.
Македонија
Обвинение за насилство за таткото кој повреди 15-годишни деца на фудбалскиот натпревар во Штип

Основното јавно обвинителство Штип поднесе Обвинителен предлог против едно лице за кривично дело – Насилство од член 386 став 4 во врска со став 3 и став 1 од Кривичниот законик.
На 24 август, на фудбалскиот стадион “Бело Брдо“ во Штип, за време на фудбалскиот натпревар помеѓу пионерските екипи на фудбалските клубови “Брегалница“ од Штип и “Шкупи“ од Скопје, обвинетиот со грубо насилство ја загрозил сигурноста на оштетените две 15-годишни деца, кои биле играчи во тимот на ФК “Брегалница“.
На децата им нанел телесни повреди, а кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.