Македонија
Aхмети му се пожали на бугарскиот амбасадор: Албанците избрани од ВМРО ДПМНЕ се откажаа од Европа
Во седиштето на Демократската унија за интеграција, претседателот на ДУИ, Али Ахмети, го прими амбасадорот на Бугарија во Скопје, Жељазко Радуков.
Како што информираа од ДУИ, Али Ахмети му честитал на амбасадорот Радуков за враќањето во Северна Македонија и го уверил дека блиската соработка во поглед на европската иднина и добрососедството ќе продолжи уште повеќе.
Ахмети и Радуков разговараа за преговарачката рамка на Европската Унија и интеграцијата на земјата во ЕУ, како и за актуелната политичка состојба во земјата и регионот.
„Преговарачката рамка одобрена од Европската унија е јасна и мора да се спроведе за да го продолжиме нашето патување кон Брисел“, велат од ДУИ.
Бугарската заедница во Северна Македонија е реалност и треба да биде вклучена во Уставот, а од ова никој ништо не губи, напротив, сите добиваат, беше кажано на средбата.
Ахмети подвлече и дека приоритет на ДУИ е токму продолжување на европскиот пат, затоа уставните измени мора веднаш да се случат бидејќи граѓаните очекуваат да станеме дел од Европската Унија.
Првиот човек на ДУИ повтори дека Охридскиот договор, Договорот од Преспа и Договорот за добрососедство се одредби на ДУИ и ќе се ангажира за нивна поддршка и имплементација.
Ахмети и Рудаков разговараа и за политичката состојба во земјата, при што Ахмети зборуваше за, како што рече, тенденцијата на власта со моноетнички легитимитет и на надгласувачкиот Уставниот суд целосно да го прекрши Охридскиот договор, неговиот дух и социјалната кохезија кај нас со наметнување етничка надмоќ.
„Ова е неприфатливо. ‘Чесните’ и претпочитани Албанци избрани од ВМРО ДПМНЕ се откажаа од Европа, но и од еднаквоста, омаловажувајќи ги и понижувајќи ги Албанците за нивните лични корумпирани мотиви“, додаде Ахмети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ: Наместо 12 отсто наставниците добиваат само 5 проценти зголемување на платите
Најавата на владата на Мицкоски за минимално зголемување на платите на наставниците од само 5 отсто наместо планираните 12 проценти е срамно и претставува обид за амортизација на незадоволството коешто постои, велат од Социјалдемократскиот сојуз на Македонија преку соопштение.
СДСМ смета дека Владата ги потценува наставниците и нивниот труд, а на наставниците и просветните работници не им требаат утешителни награди туку реален раст на платите.
„Наставниците заслужуваат поголема почит и поддршка за нивниот труд и напор во воспитувањето на идните генерации, а не минимални, козметички зголемувања на плати кои не одговараат на реалните потреби. Во предизборната кампања, Мицкоски и неговите соработници ветуваа значајно подобрување на животниот стандард на наставниците, но сега, кога се на власт, ги заборавија своите ветувања и се фрлија на манипулација. Манипулацијата очигледно е со цел да се спречи најавуваниот штрајк во образованието а не да им се излезе во пресрет на наставниците“, велат од СДСМ.
Опозициската партија додава дека пари има во буџетот а наставниците и просветните работници заслужуваат реално и вистинско зголемување на платите кое треба да биде 12 отсто.
Македонија
Вреди: Али Ахмети и ДУИ леат крокодилски солзи поради губењето на власта
Колку повеќе завива Демократската унија за интеграција, толку повеќе се разобличуваат нивните лаги и манипулации, и толку подлабоко паѓаат во стапиците што самите ги поставиле за да ги закопаат своите политички противници, реагира коалицијата Вреди, Влен.
„Аргументот на Али Ахмети за легитимитет е разобличен со фактот дека барем тројца од пратениците на „Европскиот фронт“ не зборуваат албански, и на албанската јавност ѝ се обраќаат на македонски јазик! Во оваа група се поранешниот претседател на Уставниот суд Сали Мурат, милионерот и пратеник Исмаил Јахоски, познат како Пуцко Петрол, и пратеникот Бејџан Иљас. Второ, Али Ахмети одамна го загуби ексклузивното право да зборува во име на Охридскиот договор.
Бидејќи долго време е на власт и за да ја зачува својата фотелја, Ахмети направи стотици отстапки и извитоперувања на основните дефиниции на Охридскиот договор. За време на неговиот 22-годишен мандат, официјализацијата на албанскиот јазик стана предмет на пазарење, децентрализацијата на власта деградираше во банално прашање, додека вниманието се посвети само на збогатувањето на неговите вечни функционери.
Трето, Али Ахмети веќе нема морален кредибилитет да зборува за статусот на поранешните борци на Ослободителната народна армија (ОНА). За жал, за време на сите мандати на Ахмети беа затворани и убивани поранешни борци на ОНА.
Неговиот заменик Арбер Адеми беше фатен на дело! Јавноста виде во оптужницата што Арбер ја поднесе против државата поради „бегството од домашен притвор“ на Блерим Рамадани. Покрај тоа, сите влади на Али Ахмети досега редовно доделуваа финансиски средства за социјална поддршка на бранителите. Но, ниту една влада на Али Ахмети досега не го решила статусот на поранешните борци на ОНА.
Четврто, Али Ахмети го вложи својот кредибилитет и моќта на неговата партија за, преку контрола на судството, да го спаси Никола Груевски од затвор. Фактот дека Сашо Мијалков денес е слободен граѓанин, а сите негови казни застареа затоа што ДУИ заедно со Кренар Лога го сменија Кривичниот законик, не бара дополнителен аргумент дека Али Ахмети бил животно заинтересиран и работел на спасување на Груевски и негово враќање како херој од Будимпешта.
Петто, Али Ахмети имаше 22 години време, шест владини мандати, министер за надворешни работи и ПРЕМИЕР за да ги реши отворените прашања со соседите и да ја направи Северна Македонија членка на Европската Унија. Али Ахмети не успеа. Сега е време Али Ахмети да биде опозиција. А приоритетите и политиките на државата, како и нејзините стратешки ориентации, ги определува владата“, велат од Влен.
Македонија
(Видео) Наставниците и професорите ќе добијат покачување на платите за 5 отсто
Наставниците и професорите од основното и средното образование, ќе добијат покачување на платите за 5 проценти, почнувајќи од октомвриската плата.
Претседателот на Самостојниот синдикат за образование, наука и култура (СОНК), Јаким Неделков, изрази задоволството за покачувањето, истакнувајќи дека е договорен континуиран раст на платите за просветните работници во наредните четири години.
Премиерот Христијан Мицкоски рече дека бил постигнат историски договор во насока на подобрување на условите за наставниците и професорите.
„Од октомвриската плата практично која што ќе биде исплатена во ноември па се до февруарската плата којашто ќе биде исплатена март 2025 година ќе имаме покачување од 5 отсто на платите, потоа во март 2025 година ќе имаме покачување од 7 проценти, во март 2026 година во зависност од состојбата на Буџетот ќе имаме покачување помеѓу 7 ипол и 10 отсто. Исто во зависност од состојбата на буџетот во март 2027. ќе имаме помеѓу 7 ипол и 10 отсто и исто така зависно од состојбата на полнењето на Буџетот во март 2028 година ќе имаме помеѓу 10 и 12 ипол проценти покачување на платата, што би значело во овој дијапазон за којшто сега зборуваме во март 2028. наставниците и професорите во основното и средното образование треба да зимаат отприлика минимум 46 отсто повисока плата од таа којашто ја земаат денес, а може и повеќе во зависност од тоа која скала ќе биде применета, а тоа ќе зависи од приходната страна на самиот Буџет“, рече Мицкоски.
Договорено е и најдоцна до февруари месец Колективниот договор да биде завршен и потпишан.