Македонија
АВМУ ги одби телевизиите за следење на работата на порталите
Советот на Агенцијата за аудио и аудиовизуелни медиуми ја усвои во петокот методологијата која ќе се применува за набљудување на известувањето на радиодифузерите во предизборниот период и притоа го отфрли барањето на Македонската медиумска асоцијација со методологијата да се определи дека ќе се набљудува работата и на интернет порталите, како што е предвидено со изборниот законик.
Претходно во вторникот кога беше претставена нацрт-методологијата за мониторинг на изборното медиумско претставување преку радио и телевизиските програмски сервиси за предвремените парламентарни избор кои би требало да се одржат до крајот на годината, петте најголеми телевизии во земјата побараа Агенцијата да го почитува и делот на Законот кој предвидува да се набљудува работата на интернет порталите.
„Кога станува збор за барањето на повеќе заинтересирани страни да се врши мониторинг и на електронските публикации, односно порталите, мораме да кажеме дека Агенцијата не го прифаќа ова барање. Не дека Агенцијата ја избегнува обврската или дека нема стручни капацитети за вршење мониторинг, меѓутоа за да се врши мониторинг на спроведувањето на одредбите од изборниот законик кај електронските публикации неопходни се претходно соодветни законски измени“, рече директорот на АВМУ Зоран Трајчевски.
Изборниот законик предвидува дека и интернет порталите мора да бидат подложни на идентични проверки како и телевизиите и радио станиците. Методологијата, за која стручните служби во АВМУ велат дека е подготвена врз францускиот модел, предвидува оценување на известувањето на медиумите врз основа на квантитативни и квалитативни оцени. Во квантитативниот дел, методологијата предвидува дека медиумите треба за партиите од опозицијата да издвојат најмалку половина од времето кое ќе биде одвоено за партиите од власта и за носителите на јавни функции.
Емилија Јаневска од Секторот за програмски работи на АВМУ изјави дека не е возможно да се бара издвојување еднакво време за кандидатите на позицијата и носителите на државни функции, од една страна, и за опозицијата, од друга страна, поради потребата на медиумите да известат за дејствувањето на државните институции.
Членови на Советот оценија дека со оваа одредба ќе се постигне зголемена застапеност на опозициските претставници во информативните програми, која ќе биде во пропорција со застапеноста на прилозите со кои се информира за настаните од јавен интерес и активностите на позицијата. Членовите на Советот, исто така, по претходна консултација со стручните служби, прифатија одреден број технички измени на методологијата.
Одбиени беа предлозите периодот во кој ќе се оценува дали медиумите ги кршат правилата за балансираност и правичност да се скрати од десет на седум дена, но беше прифатено барањето бројот „дозволени’ прилози во кои ќе се забележи прекршување на законикот да се намали од десет на пет во подоцнежниот период на изборната кампања.
Не беа прифатени и предлозите да не се бара од медиумите да имаат обврска да постигнат баланс во случаи кога политички партии систематски одбиваат да обезбедат соговорник или да дадат изјава за тој медиум. Избришана е и одредбата дека времето кое медиумите ќе го одвојат за претставници на граѓанските организации кои дејствуваат проопозициски да се брои во вкупното време кое е одвоено за опозицијата.
Во Агенцијата се одржа и средба на членовите на Привремената Комисија за Следење на Медиумското претставување, која треба да го преземе носењето на оценките за тоа дали одредени медиуми ги прекршиле одредбите од изборниот законик на 100 дена пред изборите. Ова тело сé уште не е конституирано во целост и не постигна согласност за избор на неговиот петти член./крај/мф/с
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Не е точно дека со ДУИ подготвуваме сценарио за бојкот на вториот круг на претседателските избори“, кажа Ковачевски
Претседателот на СДСМ, Димитар Ковачевски кажа дека не е точно дека подготвуваат со ДУИ сценарио за бојкот на вториот круг на претседателските избори на 8 мај.
„Тоа не е точно, јас вчера имав многу јасна порака на митинзите во Сарај и Чучер Сандево. Ги повикувам сите гласачи масовно да излезат на 8 мај и да ги поддржат претседателскиот кандидат Стево Пендаровски и коалицијата За европска иднина на парламентарните избори. Да избереме и претседател и парламентарен состав, Македонија да продолжи на својот пат на европските инетеграции“, рече Ковачесвки.
Тој кажа дека никој не ги има гласачите под своја контрола за да ги наведува како да гласаат.
„Ја примивме пораката во првиот круг за сите грешки кои ги направивме минатите седум години. Очекуваме да ја добиеме поддршката во вториот круг. Нормално е дека нашето членство го повикавме на изборите. Свесни сме дека граѓаните испратија јасна порака до СДСМ, дека граѓаните укажаа на грешките. Работевме во услови на голема пандемија, енергетска и економска криза предизвикани од војната во Украина. Свесен сум за нивото на инфлација и цените. Се обидовме да ги зголемиме и платите и пензиите секој да се справи на најдобар начин со оваа криза. Знам дека тоа не беше доволно, знам дека треба повеќе. Во новата програма имаме и зголемување на платите и на пензиите и секако многу јасни мерки во однос на владеење на правото и борбата против корупцијата“, кажа Ковачевски.
Тој очекува во вториот круг поддршка од сите граѓани во Македонија.
Ковачевски кажа дека Пендаровски е граѓански кандидат и ја бара поддршката од граѓаните, а не од претседателските кандидат коишто не се пласирале во вториот круг.
„Имаме разговори со политичките партии на различни нивоа и ги повикувам сите да имаме масовна излезност на 8 мај. Да избереме претседател на државата со којшто ќе имаме сигурна европска иднина и да избереме парламент што ќе носи храбри одлуки за државата, за да го дадеме на граѓаните она што го заслужуваат и очекуваат“, рече лидерот на СДСМ.
Тој додаде дека со крената глава продолжуваат во вториот круг и знае од што се незадоволни граѓните.
Македонија
(Видео) Стојаноска: Време е да се обединиме сите околу тоа повеќе да не функционираме како до сега
„Во текот на вчерашниот ден направивме анализа од резултатите од првиот изборен ден на претседателските избори и истото покажува дека голем број на нашите сограѓани Албанци, Турци, Роми и Бошњаци го имаат дадено својот глас за нашиот претседателски кандидат Гордана Силјановска Давкова“, рече Дафина Стојаноска, носител на изборна единица 6.
„Во име на тоа, од срце им се заблагодарувам на сите мои сограѓани и ги повикувам истото да го направат да го направат и во вториот круг имено ВМРО-ДПМНЕ подава рака кон сите, време е, момент е да се обединиме сите околу тоа повеќе да не функционираме како до сега, туку да вложиме да инвестираме во вистинска слобода, вистинска благосостојба и вистински соживот особено за нас особено во шестата изборна единица. Време е заедно да се спротивставиме на криминалот и Македонија да ја направиме своја и горда“, изјави Дафина Стојаноска, носител на изборна единица 6.
Македонија
„Алкалоид“ добитник на „Патент на годината за 2023“ за иновативниот „Омепразол“ во течна форма
Иновативната формулација на „Алкалоид“ АД за лекот со додадена вредност „Омепразол“ во течна форма, готов за употреба, прва од ваков тип во светски рамки, е прогласена за „Патент на годината за 2023“ од Државниот завод за индустриска сопственост, во рамките на пригодното одбележување на Светскиот ден на интелектуалната сопственост – 26 април.
Меѓународната патентна пријава на „Алкалоид“ за „Oмепразол“ во течна форма беше поднесена на 17 април 2020 година, со опфат на голем број региони и земји, меѓу кои земјите од Европската Унија, САД, Канада, Кина, земјите од Евроазиската економска унија и други. Патентната пријава при Европскиот завод за патенти, чии ингеренции опфаќаат патентни активности во 39 земји во Европа, беше одобрена на 3 август минатата година и валидирана во триесетина земји, меѓу кои и Македонија.
Патентот на „Алкалоид“ АД ја заштитува течната фармацевтска дозна форма на „Омепразол“, која се базира на два посебни раствори содржани во двокоморско пакување, кое при отворањето автоматски ги меша двата раствора и така се добива готовиот течен омперазол за употреба. Овој препарат е наменет, пред сѐ, за третман на рефлуксен езофагитис и на гастроезофагеалната рефлуксна болест (ГЕРБ) кај малите деца кои не можат да голтаат таблети, како и кај возрасните пациенти кои имаат тешкотии со голтањето (пациети со дисфагија) и неможност за голтање (пациенти со поставени сонди за гастрично хранење и/или геријатриски пациенти).
Државниот завод за индустриска сопственост е основан на 1 декември 1993 година како самостоен орган на државната управа и е надлежен за вршење на работите во врска со стекнувањето и со заштитата на правата од индустриска сопственост кои опфаќаат патенти, индустриски дизајни, трговски марки и ознаки за потеклото на производите. Оваа институција триесетта година по ред традиционално организира активности во насока на афирмација на улогата на индустриската сопственост во поттикнувањето иновации и креативни творби.
ПР